Thangthar zingah footballer tha tak tak an rawn lang thin a, an hma hun ngaihtuahin man tam tak takin club lam pawhin an lei thin tih kan hria. Mahse chu chuan player experience nei thate hlutna erawh a tih hniam phah chuang lo. 

Football la khel mek zinga hlu ber-ah thla liam taa kum 35 tling thar hlim Messi chu thlan niin pa li naah Luka Modric a awm a, €10 million hlutna a la nei a, panganaah Keylor Navas awmin a hlutna hi €8 million a ni bawk. Midang pathum te chu:

3. Manuel Neuer 
    German goalkeeper Manuel Neuer hi tun hnaiah a hniam deuh anga sawi awm mah se tun thlengin club ropui Bayern Munich duhthlan number 1 a la ni. A kum a upa a ni satliah lo va, mual chhunga hruaitu tha leh fuihtu niin club captain a ni mek. 

Kumin March thla-a kum 36 tling thar Neuer hi tun hnai kum hnih chhung hian chetsual zauh zauh a nei ve tan a, mahse season liam ta chhung pawh khan goal 26 chiah a chhuah. Tuna a hlutna hi €15 million bawr a ni.

2. Cristiano Ronaldo        

Cristiano Ronaldo hi kum 37 ni tawhin khawvel club ropui ber pakhat Manchester United chuan an hmatawng turin an la ring ngam. Season liam ta pawh khan Portuguese international hi United tana goal khung tam ber niin goal 24 zet a la thun thei a nih kha. 

Ronaldo hian finna bakah rilru huaisenna leh taksa chakna a nei kawp vek a, hei hian tun thlengin khawvel player tha ber a la nih tir a tih ngam. Season liam ta khan an vanglai hmang mek Mohamed Salah leh Son Heung te chu Premier League goal khung tam ber an ni a, golden boot dawngtute ai hian goal nga chiahin a thun tlem zawk a ni. Tunah Ronaldo hlut zawng hi €30 million a ni.

1. Lionel Messi 
Lionel Messi hian season liam ta khan tun hnaia season a hman chhiat ber Paris Saint-Germain lamah a hmang a, mulal chhungah che ropui lo mahse a lo lar tawhna vangin a jersey chu season tluana hralh tam ber a ni thung.  

Ligue 1 lamah hian che fuh lo hle anga a lan lai hian strike vantlang goal thun zat erawh a thun tho a, assist pawh tum 15 lai a nei. Champions League game 7 a hmachhawnah goal 5 a thun thei bawk. UCL-ah phei chuan vantlang chung daih a la ni thung. 

Thla hmasa June ni 26-a a kum 35-na birthday lawmtu Messi hi defender te tana striker hmachhawn huphurhawm ber pakhat ala ni mek a, kumin kum tawp World Cup-ah pawh player en bik hlawh ber tur a ni ngei ang. Tunah hian Messi-a hlutna hi €50 million vel a ni mek.