Aizawl: Kum 4 kalta (2012 atanga October 2016) inkar chhung khan Child Welfare Committee chuan Mizoram ah naupang venhim ngai case 5622 an chingfel. Nimin November ni 19,2016 kha khawvel puma naupang venhimna ni 'World Day for the Prevention of Child Abuse' a ni a, he ni pual hian District Child Protection Unit, Aizawl leh Child Welfare Committee te chuan Aizawl Press Club ah chanchinbumite kawmin an hmalakna te an sawi. CWC Chairman Prof. Lalkima chuan naupang pawikhawihtu zingah ruihhlo ti thin an tam nia sawiin naupangte venhim leh kawngdik kawhhmuh a tul hle niin a sawi. CWC member Vanramchhuangi chuan CWC chuan case mak tak tak mahni pa ngeiin a rai te, naupang ruihhlo zawrh luihtir te a awm niin a sawi a. Dr. C.Lalsangzuala CWC Member pawhin drug hmansual kawngah Mizoram chu a neplo tih sawiin a bikin kum 12-16 inkarah a hluar hle a, ruihhlo leh rukruk chu a inkawp deuh zel niin a sawi bawk. DCPO James Lalthangmawia  report tarlan danin kum 2012 atanga October 2016 inkar chhung khan Mizoram ah CWC chuan case 5622 an buaipui a, hengte hi pawngsual leh khuaikhem 451, taksa chunga hleilenna 271, rilru hliam tuar 91, naupang ngaihthah 474, nu leh pa fa enkawl tlak lo 662, ruihtheih thila buai naupang puih ngai 54, fahrah 146, sawrkar hnena fa pek 189, fa kalsan 108, child labour 29 leh rukbo 24 te an ni a. Juvenile Justice Board record danin kum 2012-2016 chhungin naupang dan bawhchhia case 1214 a awm a, chung zingah chuan MLTP bawhchhia 94, drug kaihhnawiha man 45, rukru, in rawk leh misuam case 659 te an ni. Zawhna chhangin CWC hotute chuan India ram state dangte ngaihtuahin naupang case chu Mizoram ah tamlo mahse mipat hmeichhiatna lama khawihchhiat case erawh chu a sang fal hle niin an sawi a. Naupang chunga hleilenna chu a bikin veng hmawr leh khawsak changkanglo deuh zingah a hluar niin an sawi bawk.