Aizawl: Mizoramah kum 2011 atanga kumin 2015 March thla thlengin Mizoram police te chuan pawngsual case 411 an ziak lut a,case ziah luh loh thahnem tham tak pawngsual hi a thleng nia thu dawn a ni a, ziah luh zingah pawh kum-tlinglo an tam ber a ni. Mizoram Police - CID (Crime) hotute hnen atanga thudawn danin 2011 atanga kumin March thla thleng khan pawngsual avang hian mi 445 man an ni tawh a, kumtlinglo pawngsual tawk 262 awmin, kumtling pawngsual 149 an awm a, pawngsual rawn vawi 14 a thleng nia thudawn a ni. Naupang khuai khem buaipui thintute chuan police te’n case an ziah luh loh a awm niin an sawi a, ngaihdam indil leh sum leh paia inrem mai a awm thin a, hei hian pawngsual ngawihbopui thahnem tak a thlen phah niin hetiang buaipui NGO chuan Zalen a hrilh. “2012 khan naupang chunga hleilenna do let tur leh an chanvo an hmuh theihna turin Mizoram State Child Protection Society, Social Welfare Department hnuaiah din a ni chauh a, naupang chanvo inchhuhsakna hi kan ramah pawh a lo tam hman hle a. Hmeichhe naupangte chu an inchhung ngeiah pawh an him tawh lo a, nu leh pate’n he lam hi an hriat chian a pawimawh hle,” tiin ISPS Nodal Officer, Laldikkimi chuan Zalen a hrilh a. Kumtlinglo hum-himna dan POCSO a awm tawh avangin tunhma anga hmeichhe kuah thuak thuak te pawh he dan hmang hian hrem theih an nih bakah hremna a nat avangin mipate chu fimkhur turin a chah. “Pawngsual ah naupang thiam lohna a awm lo a, nu leh pa thenkhat chuan an fate an dem fo a, naupang rilru a tichhe zual thei a, demna tur an awm lo, a nghawng hi sawi tam ila nu leh pa tamtak an harhchhuah theih chuan inven lamah hma a lak theih ang,” MSCPS Officer pakhat chuan a sawi. “Mi dangin an thinhrik hlauh vanga ngawihbopui an tam a, naupang khuaikhemtu te hi insiam rempui mai lovin, an thiltih pawizia an hriat chian ngei theih nan Dan hmanga an chung thu rel tir ngei hi a tul a ni,” tin Vanlalruati, zirbingna nei tawh chuan a sawi bawk. Thudawn danin Aizawl khawpui chhung veng hrang hrangah hian ngawihbopui vanga mi hriat loh pawngsual a thleng fo thin a. Naupang khuaikhem tute hi mi-hrang ni lo in an laina an ni fo thin a. Sakhaw rawngbawltute pawh an bang lo niin thudawnna chuan a sawi a; pawngsualtu thenkhat chu kohhran rawngbawltu niin kohhran hruaitute ngen na anga in sawi rema police thleng pha lote a awm a ni.