ZALEN December 30, 2025 : Mizoram sawrkar chuan kum 2009 atangin halpuah leh halmawi a khap tan a, chutihrualin khap rem a la ni hlei thei lo a, Kum 1986 atanga an veng chhunga khapna kengkawh tan tawh Kulikawn-ah chuan halpuah leh halmawi hian hmun an chang tawh lo.

Kulikawn hi a tir atangin an hlawhtling nghal mai bik lo a, hun rei tak chu kawng hrang hrangin hma an la a, a tira bul tantu hi Village defence Party (VDP) an ni a, a hnuah erawh Village Council lamin an kut ken a, hma an sawn hret hret a, 2002 atang khan chuan an veng chhungah halpuah leh halmawi an hal tawh ngai lo tih Kulikawn Branch YMA President Rayner Malsawmtluanga chuan ZALEN a hrilh.

Kulikawn YMA President hlui leh tuna Adviser ni mek Laldawngliana chuan halpuah leh halmawi tirem tur hian hruaitu hmasate an thawk nasa hle tih a sawi bawk a, Sawrkar leh CYMA hnena ram puma halpuah leh halmawi khap tura rawtna pawh Kulikawn Hruaitu hmasate an ni a ti.

Laldawngliana chuan Aizawl khawpui chhung veng dang ten Halpuah leh halmawi an hal dup dup lai, Kulikawn Veng an fihlim tawh hnu kha chuan Veng dang atangin December 31 zan hian damlo chi hrang ten Kulikawn-ah an chhungte an rawn bel thin tih a sawi a, an hruaitu hmasate hma lo lakna kha a lo finthlak hle a ni tih hi tunah hian an hre tawlh tawlh tih a sawi bawk. 

Kulikawn Branch YMA President Rayner Malsawmtluanga pawhin a hunlaia an veng chhunga halpuah leh halmawi khap a ni bik kha changkang loh thlak an tih thin ZALEN a hrilh a, mahse, an hruaitu hmasa te hmathlir lo thui zia tun hnuah an hre chho mek tih a sawi a, sum tam tak luangral tur an lo veng reng chu thil tha tak a ni a ti. Halpuah hal chakna hi an thalaite pawhin chakna an nei tawh lo niin a sawi bawk.

Kulikawn Branch YMA hian halpuah leh halmawi an khap hnu 2021 atanga khan thalaite tan Kulikawn Nite chu Kumhlui thlan zan-ah hian an huaihawt ziah ta thung a, tun thlengin he Nite hi an la kalpui a, naktuk zanah pawh hian halpuah leh halmawi tel lova hmang duh zawng zawng te telpui turin an sawm a ni.