Aizawl February 3, 2023: PC Party Office building sak that tur thiahna a thawk chhuak party mi te hmaah Sr.Vice President Lalrinzuala Chawngthu chuan, ''PC Party Office building thar - 'Brig. T. Sailo Rûn' sak hna kan tan lai hian MLA General Election atan pawh kan inpuahchah chho mup mup a, PC mipuite pawh Office thar sak tur leh election atan rilru lo siam sauh sauh turin ka chah a ni," a ti.

Rinzuala chuan, ''Israel fate kum 40 zet Sinai thlalerah chawmhlawm ni chunga puar leh fàn châka an chhâwlhal ang khan hmasawnna ngelnghet leh rotling neia puar châkin kum 40 zet kan vakvai mêk a. He kan vahvaihna atang hian: dik leh tha zawk, dan hmanga rorelna, in nei lo te'n chenna in an neih a, hna nei lo te'n hna an neihna tur sawrkar rin tlak - 'Kanan ram' kan chuangkai thuai dawn. Tunah kan Party Office building pawh kum 40 hnu ah kan thiat ta a ni.

PC Party Sr.Vice President chuan, "Kumin inthlanpuiah hian sawrkarna fawng chelhtu zîngah kan tel ngei dawn a, kan hawi lamin sawrkar siamna kawngah awmzia a nei hle dawn. Sawrkarna ah telin thawnthu ang lek leka thangthar te'n an hriat riai ruai tawh Pu Thena hmathlir (Vision) kha vawiinah pawh kan ram, kan hnam leh kan sakhaw himna leh hmasawnna bulpui a ni a, mi thiam leh mi puitling te'n an ngaih avangin 'Brig. T. Sailo Rûn' din thar rualin kan tungding dawn a ni," a ti bawk.