American Danielle Collins hnehtu Ashleigh Barty chu Australian Open 2022 hmeichhe champion thar niin kum 44 hnua Australia ram mi ngei Australian Open-a champion leh thei hmasa ber a ni. 

Melbourne Park-a final khelhah hian Barty hian seeded 27-na hmeichhe huaisen American Danielle Collins chu 6-3, 7-6(2) a hnehin kum khat chhnga Grand Slam khelh hmasak ber Australian Open 2022 hmeichhe single champion a ni. 

He inkhelh hmuhnawm takah hian Barty hi a chungnung hret zawk a, set khatna chu harsa lutuk lovin 6-3 a la thei mai a. Mahse, Collins-i’n tlawm mai a tum lo. Theih tawp rawn chhuahin set lak ve ngei a tum, 5-1 zetin set hnihnaah hma a rawn hruai thei. Mahse, world number 1 Barty a buai lo va, a zam hek lo. Tantu ngah Barty chuan 7-6 a rawn  pawt thla lehin straight set-in a rawn hneh ta a ni. 

Australian Barty hi tournament tluanin a che tha tluan chhuak zak a, history ropui tak siamin amah tantu a ram mipui mi thahnem tak hmaah champion trophy a chawi thei ta a ni.

'Mumang ram a cheng”

An inkhelh zawha lawmthu a sawinaah Ash Barty chuan,"Ka team te. wow! Min hmangaiha min tantu heti zozai in awm hi ka van lawm tak em. Kil sir khat atanga min fuih phur rengtu leh min hmangngaih em emtu ka nu leh pa leh ka lawizawn te, nangni ang chhungkua ka nei chu hi ka van vannei tak em. Kan team inkungkaihna hi chu tu mahin an thlak danglam thei lovang,” tiin bul a tan a. 

Sawi zawmin,"Umpires zawng zawng te, ball chhar tute nuam taka inkhel theia min siamtu zawng zawng te kan tan in van hlu tak em. In tel lo chuan eng mah kan ni lo” a ti. 

Barty chuan,"Hun rei tak chung ka lo suangtuah thin chu zanin hian a thleng dik ta. Zanin hian Aussie ka ni hi ka inchhuang tak zet a ni. Entu mipui mi tantute zawng zawng chungah ka lawm em em a, kan la inhmu leh vek dawn nia,” tiin entu mipui te chu a thlah a ni. 

Aussies naupang te cho phurtu Barty

Ashleigh Barty hi kum enge maw chhung chu world number one ni thei a ni a, mi invawng leh taima tak a nihna hi entawn tlak tak a ni. Aussie mipui te cho phur turin Wimbledon a chawi a, chu aia title ropui chu tunah Melbourne-ah ngei a chawi leh ta a nih hi.

The Age newspaper chuan,“Barty vang hian Australian naupang  tennis khel an pun phah nasa hle a, kum hmasa lam aiin 30% zetin an pung tawh a, a tam zawk chu hmeichhia an ni bawk. Heng zawng zawng hi Barty vang vek a thleng a ni,” tiin an ziak a ni.