Aizawl: Mizoram sawrkar hnathawkte kum 5, kum 2013-14 atanga 2017-18 inkar chhunga damdawi ina an inenkawlna senso ‘medical reimbursement’ chu Rs. vaibelchhe 447.26 a ni. Health & Family Welfare department chhinchhiah danin kum 2013-14 chhung khan sawrkar hnathawk ten MR bill an neih zat chu nuai 8,515.47 a ni a, kum 2014-15-ah cheng nuai 7,712.15 sen niin, kum 2015-16-ah nuai 7,809.09, 2016-17-ah cheng nuai 9,421.95 leh kum kalta 2017-18 khan nuai 11,267.84 sen a ni. Nikum 2017-18 chhung khan Mizoram State Health Care Society chuan Health Care Scheme hnuaiah damlo inenkawlna bill lut 2,501 dawngin, heng mite bill zat chu Rs. 8,09,91,931/-a ni a, RSBY ah damlo inenkawlna bill lut 5,143 awmin, chung mite bill zat chu Rs 2,82,41,599/- a ni thung. Mizoram sawrkarin sawrkar hnathawkte medical reimbursement (MR) bill atana sum sen tam lutuk titlem tura ruahmanna a siam angin, sorkar hnathawkte MR bill chu Mizoram State Health Care Society (MSHCS)-in sorkar kumin April 1, 2018 atang khan hmalakna an kalpui tan a, MR bill hi MSHCS rate anga kalpui a ni tawh.