Aizawl: Kum 5 chhungin Indian Army a lut Mizoram atangin 1017 an ni a, hei hi ram pumpui atanga lut zat atanga chhutin 0.33% chauh a ni. Kum nga chhunga Indian Army a ram puma lut zat hi thalai 309,647 niin Ministry of Defence chuan a chhinchhiah a, heng zinga 1017 chu Mizoram atanga lut an ni. Kum 2011-12 chhungin mi 94, kum 2012-13 ah 293, kum 2013-14 ah 405, 2014-15 ah 102, kum 2015-16 ah mi 123 te an lut a, kum nga chhung hian India ram puma sipai lut zat atanga chhutin zaa 0.33 chauh an ni. Hetih lai hian Mizoram aia dinhmun chhe zawk state 5 an awm a. Kum 5 chhunga Mizoram aia sipai lut zat awm tlemna chu Goa (144), Meghalaya (569), Nagaland (691), Telangana (973) leh Sikkim (979) te an ni. 2016-17 chhung khan Indian Army hnaruak hi 53,786 a awm a, India ram puma armed forces tichak turin thalaite zinga chak zawka publicity kalpui a nih reng thu Ministry of Defense hotute chuan an tarlang bawk. Indian Army, khawmual sipaite hi armed forces (army, navy air-force) ah chuan a lian ber a ni a. Hnaruak awmdan azirin kum tinin sipai hi lak \hin a ni a. Indian army a tling tia sawi te hi Junior Commissioned Officer leh Other Ranks (OR) te an ni.