Aizawl: Kum 5 kalta 2011 atanga May 31,2015 thleng khan Mizoram ah kangmei vangin mi 20 in nunna an chan tawh a, kumin bikah mi 1 in nunna chanin inkang 38 a awm tawh bawk. Fire & Emergency Services department thawktute hnen atanga thudawn danin kum 5 kalta chhunga kangmei in thil a tihchhiat zat hi pawisa a chhutin Rs. 1,90,27,97,890 a tling hial a. Chhinchhiahna atanga a lan danin kum 2011 atanga May 2015 thleng khan in kang 481, ram kang tum 695 awmin kangmei vanga hliam 37 an awm tawh bawk. Kumin 2015 bikah chuan ramkang tum 131 awmin kangmei vangin mi 1 in nunna a chan a, hliam 2 an awm bawk. Kangmei vanga nunna chan hi PC Laldawngliana (35) Chaltlang veng, Er. Valbuanga huan enkawltu a ni. Environment & Forests Department chhinchhiah dan chuan kumin chhungin ramkang hi tum 1561 a awm niin an sawi a, March thla ah thleng tam berin tum 438 ramkang a awm a ni. Fire Department leh Environment & Forests Department chhinchhiahna inanloh chhan hi Fire lam hian kangmei liantham deuh chauh an chhinchhiah a, Environment & Forests Department lam hian kang tenau deuh pawh an chhinchhiah zel vang nia hriat a ni.