ZALEN August 19, 2026: Mizoram Chief Minister hlui leh Mizo National Front (MNF) president Zoramthanga chuan kum 60 kalta a Bachelor of Arts (BA) exam a pass hnuah, naktu August 20, 2026 hian Gauhati University atanga a degree certificate hlan a ni dawn.

India Today NE in a tar lan danin, certificate hlanna hi Gauhati University-a Phanidhar Dutta Seminar Hall-ah chawhnu dar 2:30 hian neih a ni dawn a, University Vice-Chancellor-in Zoramthanga hnenah hian certificate hi a hlan ang.

Zoramthanga hi kum 1966 khan Dhanamanjuri College, Imphal (hetih laia Gauhati University hnuaia awm)-ah English Major lain final year exam a hmachhawn a, second class-ah a pass a ni. Exam a zawh takah hian Laldenga hruaina hnuaia rambuai tan mekah MNF zawmin, underground-ah a luh tak daih avangin a degree certificate hi a la chhuak hman ta lo a ni.

He hun chhinchhiahtlak tak pual hian Amia Kumar Das Institute of Social Change and Development, Gauhati University Institute of North East India Studies leh Centre for South East Asian Studies te tangkawp chuan Zoramthanga hi special lecture "From Guerrilla Fighter to a Peace Maker" tih thupui hmangin an neih pui bawk ang. 

He lecture hi Vice-Chancellor Prof. Nani Gopal Mahanta-a'n a hawng ang a, guest of honour atan Subhash Chandra Das a tel bawk ang.

Zoramthanga hi Penguin Books-in kum 2026-a a tihchhuah a autobiography — From Guerrilla Fighter to Chief Minister — ziaktu a ni.