ZALEN Jan 23, 2026: H. Zarzoliana (68), Champhai, Electric Veng chu thlamah thia hmuh a ni a, a taksaah hliam a awm avangin a thihnaah hian thil felhlel a awm nia hriaiin Champhai Police Station-ah FIR thehluh a ni. 

H Zarzoliana hi Melbuk khaw daia Lallianmawia (Champhai Zion Veng) huan enkawltu niin, Thlamah riakin ran a vulh thin a. Tun thla ni 20, Thawhlehni tlai dar 5 vel khan a ri pa tui chawi turin thlamah thi chhawngin a hmu a, bawihsawm nghal mah se, rei loteah a thi zui a ni.

H Zarzoliana lu-ah hian kut thlakna hnuhma ni ngeia hriat hliam hmuh a ni a, he thihna chungchangah hian kut inthlakna a awm ngei ni-a hriaiin a chhungte chuan Champhai Police Station-ah FIR an thehlut a. Champhai Police-te chuan rinhlelh thila thu zawhfiah turin mi pakhat an man tawh a, thu an zawtfiah mek a ni.

A ruang hi Champhai District Hospital-ah postmortem niin Nilaini khan vuiliam a ni.

Champhai Electric Veng VC leh NGO hrang hrangte chuan thuchhuah intawm siamin an veng mi leh sa, H Zarzoliana thihna chungchangah hian mi kut tuara thi ni ngeia hriain pawi an tih thu an sawi a. Pawi khawihtu man chhuah a nih ngei theih nan thuneitute chu theih tawp chhuah turin an ngen a, a tawp thlenga an thlawp tur thu an sawi bawk.

#ZalenNews