April 12, 2023; Kum 77 mi, Champhai district, New Hruaikawn a khawsa, Pu Lalringthara chuan vawiin khan pawl 9 zir chhunzawm turin Hruaikawn High School (RMSA) ah admission a tifel.

Pu Lalringthara hian kum 2018 khan Govt. New Hruaikawn Middle School ah pawl 5 a zir tan a, a tu leh fa te rual, naupang zingah uniform hain zirna a chhunzawm a, harsatna hrang hrang karah tluang tak a zir chhunzawmin kumin ah pawl 9 a chhunzawm dawn ta a ni. 

11.5.1946 a piang niin, thil thar hriat chak, ngaihven peih mi tak, chanchinthar puante pawh ngaithla kham theilo tih tur khawp a thil thar hriat chak mi a ni. Ziak leh chhiar thiam a ni bawk a, bible pawh vawi engemawzah chhiar chhuak tawh. A phak tawk a zirna ngaisang em em mi niin, a lehkha zirin a eizawnna tibuai deuh thin mah se, a phak tawk a zirna chhunzawm zel chu a duhthusam a ni. 

Hetiang ang mi, kum upa tawh tawk thleng a high school la kal hi khawvel huap ang pawhin an tam a rinawm loh a, zirna a ngaihsanna leh a dah san tlatna hi a chhuanawm a, ngaihsan leh ngaihsak a phu takzet.