Aizawl; Hliam na tak tuara hmuh a nih hnua thi ta, mahnia khawsa, H. Chungnunga (91), Tuipui ‘D’ kutthlaktu nia rinhlelh mi pathumte chu Hnahthial Police-ten manin thu an zawtfiah mek a. Hetihlai hian Champhai Kanan-a a nupui hlui ulhbun silaia kap hlumtu chu tun thlengin a chin hriat a la ni lo.

Hnahthial Police hotute hnen atanga ZALEN thudawn danin H. Chungnunga boral chungchanga rinhelh mi pathum an mante chu Darzo leh Tuipui ‘D’ mi an ni a, judicial custody-ah dah niin an chetvel dan an chhuinaah an pathum hian pawikhawihtu nia rinhlelh an ni a, thu zawhfiah mek an ni.

Thla liam ta, February 24 zingkarah H. Chungnunga hi a mutna pindan chhuatah hliamna tak tuarin, nikhawhrelova a awm hmuh a ni a, District Hospital, Hnahthial-ah enkawl niin February 25 zing dar 9 bawr vel khan a thi a ni.

A hmu hmasatute sawi danin, zing dar 8 velah pawh a la thawh loh avangin a in bul hnaia awmte chuan kaih thawh tumin pawn lam atangin an ko a, a pindan tukverh inhawng atanga lutin thisen nen chhuata lo let reng chu hmuh a ni.

H. Chungnunga hian a tukkhumah hliamna tak a tuar a, a hmai pawh a vungin a duk nasa hle bawk a, kutthlaktu hian a in an rawk zui nia hriat a ni bawk.

Hetihlai hian February 15, 2023 zan dar 6:45 vela a nupui hlui, Lalropari (46), Champhai Kanan rawng taka ulhbun silaia kap hluma tlan bo zui ta, Lalropianga (43) chu he thu ziah lai thleng hian chin hriat lohin a la bibo a, Myanmar a lut nia hriat a nih vangin Myanmar mipui sipai, PDF-te chu zawng reng turin Champhai leh Zokhawthar Police-ten an ngen a, tun thlengin a chin hriat theih a la ni lo.