ZALEN September 15, 2024 : Sawrkar hnathawk, pian kum dik loa inziak, an pension hun (kum 60) a thlena voluntary pension-a chhuak mi 70 chuang chhinchhiah an awm tawh a. Hemi chungchang inzirtirna hi a theih ang anga kalpui a nih avangin kum dik taka pension tum mi eng emaw zat an awm mek nia thudawn a ni.

Sawrkar hnathawk kalphung hrang hrang zirchianga lehkhabu pawh eng emaw zat lo chhuah tawh, Accounts & Treasury-a thawk, Ellis H. Pachuau hnen atanga ZALEN thudawn danin, a hunlaia kum dik loa inziak/ziahsak, kum dik taka pension-a chhuak hi kum 2010 chin vel atangin chhinchhiah a ni a, tun thlengin mi 70 chuang an tling tawh.

Ellis H. Pachuau hian a theih ang angin hetianga kum dik taka pension-a chhuakte hi a chhinchhiah thin a, a hnena in-report pawh an awm thin.

Hetihlai hian hriat vek sen erawh a har avangin kum dik taka pension-a chhuakte hi tun dinhmuna chhinchiah mi 70 bawr vel ai hian an tam a rinawm.

Kum dik taka pension-a chhuakte avang hian sawrkarin sum tam tak a hum phah thei tih ZALEN thudawnna chuan sawiin, kum dik taka pension-te vangin an hnuaia mite an kaisan theih phah rualin, kum dik lo avangin kum dik taka tite kaisanna hun a awm loh phah thei.

“Kum dik taka pension-te vangin post ruak a awm phah a, hna zawnglaite tan chance tha tak a awm phah thin,” thudawnna chuan a ti bawk.

Tun dinhmunah Mizoram sawrkar hnathawk nawlpuite pension hun chu kum 60-ah bithliah a ni a, hei hi zawma a hun taka pension-a chhuak tura inzirtirna sawrkar hnathawkte zingah a theih ang angin kalpui a ni a. Hei hian rah tha a chhuah mek zel nia thudawn niin, kum dik lo inziak/ziahsak, an pension hun (kum 60) a thlena pension-a chhuah ngei tum sawrkar hnathawk zingah mi eng emaw zat an awm mek nia thudawn a ni bawk.

Hetihlai hian Mizoram sawrkar hnathawk inzawmkhawm pawl, Federation of Mizoram Government Employess & Workers (FMGE&W) chuan Mizoram sawrkarah pension hun kum 62-a pawhsei an lo dil/ngen tawh thin a, a hlawhtlinnna erawh tun thlengin a la awm lo thung.