ZALEN August 16, 2026: Sawrkar hnathawk, pian kum dik loa inziak, an pension hun (kum 60) a thlena voluntary pension-a chhuak mi za chuang chhinchhiah an awm tawh a. Hemi chungchang inzirtirna hi a theih ang anga kalpui a nih avangin kum dik taka pension tum mi eng emaw zat an awm mek nia thudawn a ni.

Sawrkar hnathawk kalphung hrang hrang zirchianga lehkhabu pawh eng emaw zat lo chhuah tawh, Accounts & Treasury-a thawk, Ellis H. Pachuau chhinchhiah danin a hun laia kum dik loa inziak/ziahsak, kum dik taka pension-a chhuak hi kum 2010 chin vel atangin chhinchhiah a ni a, tun thlengin mi 108 an tling tawh.

Ellis H. Pachuau hian a theih ang angin hetianga kum dik taka pension-a chhuakte hi a chhinchhiah thin a, a hnena in-report pawh an awm thin.

Kum dik taka pension-a chhuakte avang hian sawrkarin sum tam tak a hum phah thei tih ZALEN thudawnna chuan sawiin kum dik taka pension-te vangin an hnuaia mite an kai san theih phah rualin kum dik lo avangin kum dik taka tite kaisanna hun a awm loh phah thei.

Tun dinhmunah Mizoram sawrkar hnathawk nawlpuite pension hun chu kum 60-ah bithliah a ni a, hei hi zawma a hun taka pension-a chhuak tura inzirtirna sawrkar hnathawkte zingah a theih ang angin kalpui a ni a. Hei hian rah tha a chhuah mek zel nia thudawn niin kum dik lo inziak, an pension hun a thlena pension-a chhuah ngei tum sawrkar hnathawk zingah eng emaw zat an awm mek nia thudawn a ni bawk.

Hetihlai hian Mizoram sawrkar hnathawk inzawmkhawm pawl, Federation of Mizoram Government Employess & Workers (FMGE&W) chuan Mizoram sawrkarah pension hun kum 62-a pawh sei an lo dil/ngen tawh thin a, a hlawhtlinnna erawh tun thlengin a la awm lo thung.

Chhinchhiah china kum bawhchhiat duh lova an kum dik taka pension-a chhuakte hi mipa 67 leh hmeichhia 41 an ni.

Kum dika pension-a chhuak mi 108 zingah hian kohhran upa pawh 21 an tel.