Aizawl: Mizoram Police te chuan kum chanve (January-June, 2018) chhung khan Mizoram pumah thubuai 1233 an ziak lut a, hengte hi IPC hnuaia ziah luh 993 leh Non IPC hnuaia mi 238-te an ni. Mizoram Police record atanga a lan danin IPC hnuaia thubuai ziah luh 993 zingah hian rukruk (theft) case chu tam berin case 400 ziah luh a ni a, hei hi IPC hnuaia thubuai ziah luh zawng zawng atanga chhutin 40.28% a tling a, mi rawk (burglary) thubuai ziah luh 268 chuan a dawt a ni. IPC hnuaia thubuai ziahluh zingah hian kumin chhungin tualthah thubuai 17 ziahluh a ni a, mi thah tum case 5, pawngsual case 14 a awm a. Lirthei chetsualna a thihna thlenna (road fatal accident) case 20 leh lirthei chetsualna case 7 ziah luh a ni bawk. Non IPC hnuaia thubuai ziah luh 238 zingah hian ND&PS Act hnuaia case ziah luh 84 chu a tam ber a, thubuai ziahluh atanga chhutin 35.29% a tling a ni. Non IPC hnuaiah hian zu khapna/MLPC Act hmanga thubuai ziah luh pawh a sang hle a, case 67 ziah luh a ni bawk.