ZALEN July 5, 2026: Kumin kum chanve (January - June) chhunga Aizawla ruahtui tla zat chu mm (millimetre) 948.5 a tling a, hei hi nikum kum chanve chhunga ruahtui tla zat aiin a tlem zawk a. Thudawn danin Mizoramin fur pui a la hmachhawn dawn avangin ruahtui tlak zel dan tur erawh hriat theih a la ni lo.

Directorate of Science & Technology atanga ZALEN thudawn danin nikum kum chanve chhung khan Aizawlah ruahtui mm 1,206.5 a tlak laiin, kumin kum chanve chhunga ruahtui tla zat chu mm 948.5 a ni a, nikum aia kumin chanve chhunga ruahtui tla tlemna hi mm 258 a tling.

Nikum January-ah ruah tla a awm lo a, February-ah mm 32.0 tlain, March-ah mm 16.4, April-ah mm 61.8, May-ah 718.3 leh June-ah mm 378.0 a tla a. Kumin January-ah ruahtui mm 0.2 a tla a, February-ah ruahtui tla a awm lo. March-ah mm 223.9 tlain, April-ah mm 235.8 May-ah mm 244.6 leh June-ah mm 244.0 a tla.

Thudawn danin, nikum khan Aizawlah ruahtui mm 2,126.0 a tla a, nikum aiin kuminah ruahtui tla a tam dawn leh dawn loh hriat theih a ni lo a, Mizoramin fur pui a la hmachhawn chhoh dawn avangin kumin a ruahtui tla zat hian nikum a phak dawn leh dawn loh sawi lawk theih a ni lo.  

State Meteorological Centre, Directorate of Science & Technology-in a chhinchhiah tawh chinah Mizoramah kum 36 chhung (1986 atanga 2021) khan fur laiin (June - September) kum tin ruah mm 1,289.9 sur ang a ni.

Aizawla ruah sur dan

2019 - mm 1,518.2

2020 - mm 1,741.5

2021 - mm 1,917.6

2022 - mm 2,015.1

2023 - mm 1,972.8

2024 - mm 2,295.9  

2025 - mm 2,126.0

2026 - mm 948.5

(January -June)

Kum 2017 kha fur chhung bika ruahtui tlak tam ber kum niin June - September thla chhungin mm 1,836 a tla a. Kum 2020 kha fur chhung bika ruah tui tlak tlem ber kum a ni a, mm 856.4 chauh ruah a tla.