Aizawl; Kum hmasa lam aiin kumtin Mizoram ah khua a lum hret hret a, ruahtui pawh kum dang ai chuan a tla tam tawh zawk. Khaw lum leh vawh chungchangah pawh thilthleng danglam nasa lutuk awmlo mahse kumtin chawhrualin khua a lum hret hret tih chhinchhiahna atangin a lang a. Kumin a khaw lum ni ber chu April ni 22 niin a lum lam hi 34.6 degree celcius a tling a, hei hi nikuma a lum ber March 11 a 34.5 degree celcius aiin degree 1 in a sang a ni. Kumin chhung veka khaw vawh ni ber chu February ni 18 niin 5.9 degree celcius a ni a, nikuma a vawh ber ni January ni 11 a 5.6 degree celcius aiin .3 degree celcius in a sang zawk a. Nikum hmasa (2012) a khaw lum ni ber April ni 3 ah 33.3 degree celcius niin a vawh ber ni January ni 14 ah 5.6 degree celcius a ni bawk a ni. Science & Technology Department chhinchhiah danin kum 4 kalta chhung 2011-2014 ah kumin hian ruahtui tla a la thahnem ber bawk a. Kumin chhung hian May thla ah ruahtui a tla hnem ber a, 276.10mm tlain ni khata ruah sur tam ber ni chu May 12,2014 niin hemi ni hian ruahtui 44.3mm a tla a ni. "A kum telin khawvel hi lum hret hret mahse a lum dan hi khawvel hmundangte ngaihtuahin Aizawl ah hian a chak bik a. Hei hi a chhan ber chu khawpui kan bawh nasat(rapid urbanisation) vanga thingtlang atanga pemlut ten thing leh mau kan tihchhiat vang a ni," tiin Science & Technology Department a Principal Scientific Officer Dr. Vanlalzara chuan ZALEN a hrilh a. Tunhma thlasik laia Aizawl leh khaw thenkhata vur tla thin pawh tunah chuan hmuh tur a vang tawh hle niin a sawi.