Aizawl; Kum hmasa lam aiin kumin ah Krismas leh Kumthar ruaitheh an pung zawk niin ZALEN paliin mi hrang hrang a biak naah an sawi.
Chanmari Presbyterian Kohhran chuan Krismas ruai chu 3671 in a theh thu an sawi a, kum hmasa (3530- Krismas 2013) aiin 200 dawnin an pung a. January ni 2 ah Kumthar ruai mi 3700 zetin an theh niin ZALEN an hrilh bawk. (Mi 3436 Kumthar 2014). Ruai buaipuitu R.Sangliana chuan, "Kum hmasa lam aiin Krismas leh Kumthar ruai theh kan pung a, damlo 300 chuang an inah pek an ni a. Sa ei lo an awm tawh a vegeterian chauh ei tur a hrangin siam a ni", a ti Darkar 2 leh a chanve chhungin ruai theh an zawh hman thu a sawi bawk. Chanmari hian ruai atan Nuai 9 dawn a seng a, member 3918 an awm bawk a ni.
Mission Veng Presbyterian Kohhran ah Krismas ruai 3,081 leh Kumtharah 3,340 in an theh a. Kum hmasa lamah chuan Krismas ruai 2897 (2013) in an theh a, Kumthar ruai chu 2750 in an theh niin Malsawmkima, Secrectary, Krismas & Kumthar Committee chuan kan palai a hrilh a. "Kumthar ah kan tlem zawk ziah thin a, tum tum chu kan tam ta zawk a ni," tiih a sawifiah bawk.
Ruai theh pun chhan nia a ngaihdan sawiin Upa R.Lalmalsawma chuan "A ni a kan theh loh vangah ka ngai, a ni ah chuan mi an menrei vangin an chaua an chhuah loh phah thin," a ti a. Kohhran ngelnghet zia tilangtu leh hahdam taka hman kan thiam zel nia a hriat thu Upa Dr. Tawnenga chuan ZALEN a hrilh. Mi 4001 lawina kohhran hian Sakrament Department chhuak hlim, dan chhunga lak luh hlim te chu thleng senghawi leh Sanitation chan tirin hei hian tleirawl leh rawlthar te ah phurna a pe nasa hle tih kan thudawnna chuan a sawi a ni.
Kohhran member 1300 vel awmna Aizawl Kohhran, Venghlui ah pawh ruaitheh an tam hle a, Krismas ah 1186 leh Kumthar ah 1244 in an theh a, kumdang ah chuan Krismas aiin Kumthar ah ruai theh hi an tlem zawk thin a, kumin a an tam zawk chhan hi ruai an siam tui vang leh tlaivar tuk (January 1) ni lova ruai an theh vang nia a hriat thu Krismas & Kumthar Comtt. Secretary Laltharzela chuan a sawi.
Salvation Army hmunpui Aizawl Temple Corp ah pawh kumdang aiin ruaitheh an pung zawk nia a hriat thu Fatu Deputy Commander VL Hmangaiha chuan a sawi. Seventh day Adventist hmunpui Nisarih tlang ah chuan Krismas leh Kumthar ni khan sa tello ruai an theh a, vawiin hian sa nen ruai hi an theh nan leh dawn nia thudawn a ni.
Bawngkawn UPC (NEI) ah chuan kumdang aiin ruaitheh hi an tlem zawk niin Upa R.Lalhmangaihzuala chuan ZALEN a hrilh a. Ruaitheh an tlem zawk chhan tak hi a hriat mai loh thu sawiin ngaihsakna tlakhniam vang te, in lamah ei leh in tuihnai a awm vang te nia a rin thu sawiin "system thlak a ngai ta em ni aw ka ti deuh hial a ni," a ti bawk.