ZALEN March 1, 2026: Kum hnih chhungin Inner Line Permit (ILP) pek chhuah 3,39,992 a awm a, pek chhuah atanga sum hmuh zat Rs. 15,12,41,725 a tling.

Assembly budget session neih meka C. Ngunlianchunga zawhna Home Minister K Sapdanga’n ziaka a chhan danin, kum 2024 chhungin ILP pek chhuah 1,59,608 a awm a, 2025-ah 1,80,384 a awm bawk a. Heng kum hnih chhunga ILP pek chhuah hi 3,39,992 a tling a. Kum 2024 leh 2025 chhunga ILP pek chhuah atanga sum hmuh zat hi Rs. 15,12,41,725 a tling bawk.

Heng kum hnih chhung hian temporary ILP pek chhuah 3,17,807 a ni a, regular ILP pek chhuah 22,185 a awm a. Hemi kum chhung vek hian ILP nei lo leh ILP thi tawh thawn kir mi 1,117 an awm.

Hetianga ILP hmanga hnam dangte Mizoram an luh mek lai hian Mizo Zirlai Pawl (MZP) hruaitute chuan February 23, 2026, Thawhtanni khan Aizawl Press Club-ah thuthar thehdarhtute an kawm a, ILP chungchangah khauh leh zual turin sawrkar an ngen a, dan loa Mizorama hnam dang awmte thlavang hauh lo turin mipui an ngen bawk.

February 21, 2026 khan MZP, College SU leh Hnampual hruaituten Aizawl khawpui chhung Kulikawn, Dawrpui (Bazar), Vaivakawn, Bawngkawnah te hnam dang (vai) dan loa lut an check a, ILP nei lo/fel lo 68 an man a, thuneitute kutah an hlan nghal a ni.

MZP chuan Sairang thlenga rel a luh tak avangin Mizo mipuite harh thara mahni awm hmun theuhah ILP check uar tur leh an chhawrte ngei pawh an fel fai em tih ennawn fo turin Mizo mipuite a ngen bawk.