“Hei hi a ni, hei ngei hi a ni Premier League chu, ka dam chhunga ka duh em em chu,” tiin Nilaini zana si hnih faia West Bromwich Albion an hneh tuma Sheffield United tana an goal hnihna thuntu, Anel Ahmedhodzic chuan goal a thun laia a rilrua awm a sawi a. Blades hian Burnley zuiin season tharah Premier League an khel dawn.

Paul Heckingbottom-a team hian Bramall Lane-ah  Norway international Sander Berge leh Ahmedhodzic-a goal hmangin hnehna an chang a, Championship-ah pahnihnaah insawh nghetin khelh thum an la nei a, an hnuai chiahah khelh hnih la nei, Luton Town tan phak theih a ni ta lo va, Premier League-ah an inlan dawn ta.

Blades hi Premier League-a an kai vawi thumna niin league-a pahnihna ni chung vekin an kai.

Tun season-ah pawh Vincent Kompany-a kaihhruai Burnley hnuaiah an awm tluan deuhthaw.

Season hmasa pawh khan playoff hmangin an kai teuh hle a; mahse, Nottingham Forest lakah penalty peta chak lovin an kai zo lo.

Premier League-a an kai hmasak zawk, 2019-20 season khan Chris Wilder-a hovin pakuana lai an ni a; mahse, a dawt chiah season-ah erawh engmah ni lovin Wilder pawh bân a ni a, Heckingbottom-a’n enkawl lailawkin point 23 chauh hmuin a hniam ber an ni a, Championship-ah an tla.

2021-22 season tan dawnah Serbian Slavisa Jokanovic chu ruaiin a chet thatpui loh avangin November-ah bân a ni a, Heckingbottom bawk ruai ko lehin a nghetin an la lut a, 16-na atangin panganaah a kaipui a, Premier League kai tur zawnna playoff hial a khelhpui phak.

Forest ngam lovin league sang berah invawrh kai zo ta lo mah se 2022-23 season bul an tan tha a, a tir inkhel 10-ah vawi sarih zet an chak a. Hemi hnu vawi ruk zet chak hmel hmu lo zui mah se World Cup hma leh hnu hret velah khelh riatah vawi sarih zet chakin an hawi kir zui ta lo va, tun hi an thleng ta.

Heckingbottom-a hian FA Cup pawh semifinal an luhpui bawk a; mahse, Manchester City ngam lovin kartawpah khan an tla tawh thung.

Championship-ah hian Kompany hovin Burnley chu an champion chiang tawh a, Blades hian dawtin pathumna atanga parukna inkarten Premier League kai tur an zawng leh dawn a. He dinhmun Luton, Middlesbrough, Coventry leh Sunderland ten luah mekin khelh hnih la awmah an hnuaia awm team pali velin playoff khelh phak tumin an la bei mek.