TATA Trusts, North East Initiative Development Agency (NEIDA), Pullela Gopichand Badminton Academy (PGBA) leh Mizoram Badminton Association (MBA) te chu ‘Badminton Initiative Mizoram’ tih hnuaiah kum hnih leh a chanve dang an thawkho chhunzawm leh dawn.

Thawhhona sum hman dan tur leh programme kalpui dan tur hi Nilaini khan PGBA Conference Hall, Hyderabad, Telengana-a sawiho a ni a. MBA aiawhin Honorary Secretary Lalrinzuala Pachuau a tel a, NEIDA aiawhin B. Lalrinkima a tel bakah Tata Trust aiawhin Neelam Barbardesai, Head of Sports leh Sajith John, Consultant te telin, PGBA aiawhin Pullela Gopichand a tel bawk. 

Thawhhona thar hnuaiah hian Regional Development Centre (RDC) chu Pullela Gopichand Intensive Training Centre (PGITC) tia a hming thlak a ni a. Ngawrh lehzuala training kalpui a nih dawn bakah heta awmte hi kum tin PGBA-ah vawi thum training nei tura hruai an ni thin dawn a ni. 

PGBA-ah hian badminton coach tur Mizo lak belh a ni dawn bawk a. He thawhhonaah hian a thawkhote hian Rs vaibelchhe 3.8 vel an seng tura ruahman a ni. 

Tata Trusts, NEIDA, PGBA leh MBA te thawhhona thar tur chungchangah hian Zirtawpni kal ta khan MPSOA Conference Hall, Bungkawnah training neih a ni tawh bawk.

Training hi ‘Mizoram Badminton Project General Stakeholder Meeting’ tih niin MBA atang leh badminton coaching kal mek nu leh pa atangin aiawh an kal a, RDC coach-te bakah NEIDA leh Tata Trust-a thuneitute an tel bawk.