Aizawl: Kum kalta April 2016 atanga March 2017 inkar chhung khan Mizoram ah thisen unit 25895 lak a ni a, heng zinga 83.27% hi a thlawna pek (voluntary) a ni. Mizoram State AIDS Control Society (MSACS) chhinchhiah danin nikum chhunga thisen pek zawng zawng zinga unit 21563 (83.27%) hi a thlawn/tihbik neilo a pek (voluntary) a ni a. Mizoram a blood bank 10- Civil hospital Aizawl, Synod hospital Durtlang, District hospital Champhai, Kolasib, Serchhip, Lawngtlai, Saiha, Mamit te bakah Civil hospital Lunglei, Christian hospital Serkawn zingah Civil hospital Aizawlin thisen la hnem berin unit 14215 an la a, District hospital Mamit chu thisen la tlem ber niin unit 280 an la a ni. Mizoramah a thlawna thisen pek hi kum 2011-2014 inkar chho khan a tha hle a, mahse a hnu 2014-15 leh 2015-16 ah te nasa takin a tlahniam a, mahse nikum atang khan voluntary hian punlam a pan chho leh. Zalen zawhna chhangin MSACS thawktute chuan voluntary a thisen pe an tlem chhan chu campaign na tur sum an neih loh vang ni bera an hriat thu an sawi. “Thisen pek pawimawhzia hi inhrilh thar fo a ngai a, mahse sum kan neih loh avangin hmalak chak a har a. Kum tharah National Health Mission hnuaiah State Blood Cell a din tawh dawn avangin hmasawn lehzual kan beisei a ni,” an ti. Mizoram chu a thlawna thisen pek kawngah India ram state zingah a sang pawl a ni tiin hmarchhak bialah chuan Tripura chu Mizoramin a phak lo niin MSACS thawktute chuan Zalen an hrilh bawk.