Al Nassr striker Cristiano Ronaldo chuan kum khat lekah Saudi Pro League chuan Europe-a league pangngai tak tak, Turkish leh Dutch league a khum tawh dawn niin an sawi a. Tunah pawh MLS aiin ‘a tha zawk’ niin a sawi.

Ronaldo hian Thawhtanni zana an ram, Portugal-a LaLiga club Celta Vigo nen pre-season inkhela 5-0 a an chak loh tuma first half a khelh hnua thuthar lakhawmtuten an kawmnaah a khelhna league chungchang hi a sawi.

“Saudi league hi MLS aiin a tha zawk,” tiin Portugal star hian a US-a a kal ve dawn leh dawn loh an zawhna a chhang a. Pathiannia Inter Miami-in an tlangzarh tak, Spain-a a elpui kumhlun thin, Lionel Messi-a angin MLS-ah chuan a khel ve dawn lo a nih hmel.

Thawhtanni zana chawlhlawka 0-0 a nih laia lak chhuah, Ronaldo chuan, “Saudi league-ah hian kawng ka hawng a, player tha zawk dang pawh an lo kal zel ang,” a ti.

Ronaldo sawi ang hian tun nipuiah hian player hming lian tak takin a hnung an zui der tawh a; Karim Benzema, Marcelo Brozovic, N’Golo Kante leh Roberto Firmino te chu season lehah Saudi Pro League-ah an khel dawn tih a chiang tawh a. Inter Milan player hlui, Brozovic hian July 3-a Al Nassr a zawm fel hnuah Thawhtanni zanah pawh Ronaldo rualin a inlan tawh.

“Kum khat a liam leh chuan player tha zawkte an lo kal zel dawn a. Kum a liam leh chuan Turkish league leh Dutch league a khum tawh ang,” a ti.

Kum 38 mi hian January thlaa sawi hlawh taka a vawi hnih nana Manchester United a chhuahsan hnuah Al Nassr zawmin tunah hian a vawi khat nan season tluan hun a hmang tan dawn mek.

Real Madrid tana goal thun tam ber, Ronaldo hian Europe-ah a kir tawh dawn lo tih a sawi bawk a, tun hnaiah football hmunpui hian a level a hloh ve ta niin a sawi bawk.

“European club-ah hi chuan khawiah mah ka let tawh dawn lo tih hi 100%-in a chiang,” a ti a. “Kum 38 ka ni tawh a, European football hian a thatna (quality) a hloh ve ta deuh bawk a. Tha taka la khelhna hi chu Premier League chauh hi a ni tawh. Anni hian league dang zawng zawng lakah hma an hruai fal a ni,” a ti.