Khawvela fashion show ngaihhlut ber tih ngam Victoria’s Secret Fashion Show chu kum li lai chawlhsan lailawk a nih hnuah kumin atangin kalpui a ni leh dawn ta. Victoria’s Secret Fashion Show hi kum 24 chhung an lo kalpui tawh a, mahse company chhungah buaina neuh neuh a awm avangin kum 2019 khan an tihtawp lailawk thu an puang a nih kha - kuminah kalphung thar nen an rawn kir leh dawn e. 

Show an kalpui danah thil danglam a awm nual dawn a, kum 24 lai an lo kalpui tawh fashion show ropui hi hmuhnawm leh changtlung zawkin an rawn chhawpchhuah theih beisei a ni. Brand CFO Timothy Johnson chuan hemi chungchang hi Zirtawpni khan puangin, kalphung an thlak tur thu pawh hi a tarlang. 

Victoria’s Secret Fashion Show-ah hian khawvel huapa model lar - Adriana Lima, Candice Swanepoel, Alessandra Ambrosio, Gisele Bündchen leh Heidi Klum bakah super model dang eng emaw zat an lo inlan tawh thin. Mahse show an neih hnuhnung lamah khan entu an tlahniamin an sum lakluh pawh a tlahniam a, hei hian nghawng a nei zui ta a ni. 

Victoria’s Secret Fashion Show lo kir leh tur hi thu lawmawm a ni a, an neih hun tur tak erawh tarlan a la ni lo thung.