ZALEN, Apr. 22, 2025: Nikuma hlawhtling taka buatsaih tawh, khawpui chhunga mountain bike intlansiak, ‘Red Bull Aizawl Tlang Ruam Event’ chu kuminah pawh buatsaih a ni leh dawn a, kum tawp lam tinzawn a ni.

Thawhlehni chhun khan intlansiak buatsaih tur chungchang hi Sports Minister Lalnghinglova (Tetea) Hmar hovin a pisaah an sawiho a ni a, ruahtui hul hun, November thla an tinzawn phawt.

Nikuma Aizawl Tlang Ruam event kha India rama ‘urban downhill mountain biking event’ hmasa ber niin a kaihhnawih Instagram-a tar lante chu entu maktaduai 25 chuang a awm a. Chanchinbu, visual leh social media dang nen mi maktaduai 80-100 vel an tling tura ngaih a ni a. June thlaah minute 45-a thui documentary tihchhuah tum a ni bawk. 

Kumina buatsaih leh tur hi nikum aia lian zawka tih tum a ni a, a kawng pawh thui zawk leh harsa zawka siam tum a ni.

Intihsiaknaa tel bakah mentor pawh nikum aia tam zawk neih tum a ni a, live-a pe chhuak tur pawh biak fel tawh a ni.

Red Bull Aizawl Tlang Ruam Event buatsaih tur chungchangah hian sports minister chuan, “Nikumah hlawhtling tak buatsaih a ni tawh a, a hautakin Red Bull tan pawh senso a tam hle ang tih ka ring. Chutih rualin khawvel mithmuhah Mizoram leh Mizote min pho chhuaka kuminah kalpui leh tum a ni hi lawmawm ka ti hle,” a ti. 

Minister hova sawihonaah hian Red Bull atangin Field Marketing Manager Giridhar Narsaria chuan presentation a pe bawk.

Nikum October 25-26-a Aizawl Tlang Ruam event-ah khan Asia ram panga atangin mi 22 an tel a, Taiwan mi Chiang Shen Shang chu 1-na a ni a. Urban downhill khawvela langsar, Tomas Slavik, Czech Republic leh Pedro Burns, Chile te chu mentor an ni.