ZALEN, Nov. 29, 2024: Tuichangral Games 2025 leh Tuipuiral Games 2025 neih turah kum danga la tel ngai lo infiamna pali boxing, wrestling, weightlifting leh archery telh belh a ni dawn.

Games chi hnih neih tura sports discipline telh belh tur chungchang sawiho hian Zirtawpni khan Sports Minister Lalnghinglova (Tetea) Hmar hovin an thukhawm a. Tuichangral Games-ah hian boxing, wrestling leh weightlifting telh belhin Tuipuiral Games-ah boxing leh archery belh a ni dawn bawk.

Tuipuiral GSA-ah hian association 25 awmin Tuipuiral Annual Sports Meet vawi 52-na hi January 13, 2025 atangin Samthangah an tan dawn a. Kum danga sports discipline an kalpui thin bakah state sports association-te nen tangkawpin boxing leh archery an belh dawn a ni.

Tuichangral GSA-ah hian association 33 an awm a, March 31 leh April 9, 2025 chhungin East Lungdar-ah games hi neih tur niin kum riat leh kum 16 inkar tan boxing, wrestling leh weightlifting an telh belh ang.

State sorkar chuan sports discipline telh belh turah hian Rs. 1,00,000 theuhin a pui dawn a. sports discipline telh turah hian sports association-te nen tangkawpin Sports & Youth Services Department hnuaia coach-te bakah senior player-ten training an pe hmasa dawn a. Training hi games tan hmain khaw thlanchhuah bikah kalchilhin an pe dawn a ni. 

MINECO-a a office chamber-ah thutkhawmah hian sports minister chuan sorkarin Olympic 2036-ah Mizo infiammi tam thei ang ber tirh a tum tih a sawi a. Tuipuiral GSA leh Tuichangral GSA chu kum tina games buatsaih thin an nih angin pilot project atan thlan an ni tih a sawi.

“Tun hnaiah national leh international level-ah result duhawm tak tak kan nei a, kan rilruin National Games bakah Asian Games leh Olympic Games thlengin hlawhtlinna a ngaihtuah ngam tur a ni,” a ti bawk. 

Meeting-ah hian SYS department hotu te, Mizoram State Sports Council hotu te, Archery Association of Mizoram, Mizoram Boxing Association, Mizoram Weightlifting Association, Mizoram Wrestling Association hruaitute bakah Tuipuiral GSA leh Tuichangral GSA hruaitute an tel.