Samajwadi Party hruaitu, Azam Khan-a vawn lai assembly bial chu a ruak tih Uttar Pradesh assembly speaker chuan Zirtawpni tlai khan a puang a, Rampur bialtu MLA hi a nihna hlihsak (disqualify) a ni.

Vidhan Sabha chuan Khan-a hi Ningani khan kum 2019-a Prime Minister Narendra Modi leh Uttar Pradesh Chief Minister Yogi Adityanath laka a thu sawi (hate speech) avanga kum thum lung in tang tura hrem a nih khan disqualify nghal a ni a. A bial a ruak ta tih puan hian dan anga thil tih zuina a nih tih a sawi.

Kum 74 mi, SP hruaitu hlun hi kum 2013-a Supreme Court-in thutlukna a lo siam tawh, MLA, MLC leh MP zingah hian thubuai (criminal case) nei, a tlem bera kum hnih tang tura hrem chu rorelna in member a nihna hlihsak nghal tura tih angin a MLA nihna chu hlihsak a ni ta a ni.

Khan-a hi kum 2019 Lok Sabha inthlanah khan Rampur bial atang tho hian thlan tlin a ni a; mahse, March thlaa Uttar Pradesh assembly inthlanah MLA atan thlan leh a nih tak avangin Lok Sabha bial pawh hi a kalsan a. Assembly inthlan lai hi lung ina a awm lai a ni nghe nghe.

Ningania thiam loh a chan rual hian bail-a chhuah nghal niin chawlhkar khat appeal-na hun hawn a ni.