August 3, 2023; Hmeichhe naupang kum tlinglo pawngsualtu a puh Lalroenga chu Champhai district Special Court (POCSO Act), Sylvie Zomuanpuii Ralte chuan thiam loh chantirin, rim taka thawk chunga kum 20 lung in tang tur leh Rs. 20,000 chawi turin vawiin khan a hrem.

Court-in thiam loh a chantir Lalroenga hian kum 2020 August khan hmeichhe naupang kum 11 mi chu mipat hmeichhiatna a hmanpui a, sawi chhuak lo turin a vau bet zui bawk a, hemi hnu pawh hian vawi eng emaw zat mipat hmeichhiatna lam hawiin a khawih zui leh bawk.

Kum 2022 khan hmeichhe naupang chhungte hian an hriatchhuah hnuah Champhai Police Station-ah FIR an thehlut a, Lalroenga hi man zui a ni a, Court-in a chung chang thu hi ngun taka a ngaihtuah hnu leh thu hretu hrang hrang thusawi a ngaihthlak hnuah Lalroenga hi, Special Judge POCSO chuan POCSO Act hnuaiah thiam loh chantirin kum 20 chhung rim taka hna thawk chunga Lung in tang tur leh Rs. 20,000 chawi turin a hrem a, a pawisa chawi tur hi a pe tla thei lo a nih chuan thla 2 dang a tan belh ang.