April 13, 2023; Mizoramah kumin January atanga April ni 11 thleng khan ruihhlo vanga thi mi 26 an awm a, hetihlai hian nikum 2022 chhung khan ruihhlo vanga thi mi 43 an awm.

Excise & Narcotics department (END) chhinchhiah danin, kumin chhung a ruihhlo vanga thi mi 26 zinga mi 5 te chu hmeichhia an ni a, midang 21 te chu mipa an ni. Data atanga a lan danin, tun ang reng a nih chuan kumin hi ruihhlo vanga thi an tam kum a ni thei dawn. 

Kum 1984 atanga kumin April ni 11 thlengin Mizoramah ruihhlo vanga thi mi 1,736 an awm tawh a, chung zinga mi 1,531 te chu mipa an ni a, midang 205 te chu hmeichhia an ni.

Kumin thla 3 bawr vel chauh a thi chhinchhiah mi 26 te hi nikum a thi zat chhinchhiah zahve aia tam an ni tawh a. Hmun hrang hrangah heroin a hluar niin a lang chho mek tih thuneitu ten ruihhlo leh a zuartu an man dan atangin a hriat theih bawk.

Dan leh thupek kengkawhtu ten naupang kumtlinglo kut atangte hialin ruihhlo an man tawh a, ruihhlo do kawngah leh a ti thin ten an bansan theihna tur te leh a la ti lo ten a that loh zia an hriat a, an tih lohna tura tanrual a ngai takzet a ni.