ZALEN Nov. 12, 2024; Mizoramah kumin chhungin tui tla hlum mi 12 an awm tawh a, an zinga 11 te chu mipa niin, hmeichhe pakhat a awm.

ZALEN in a chhinchhiah china a lan danin, kumin January - November chhunga tui tla te hi kum 44 hnuai lam vek an ni a, a naupang ber chu mipa naupang kum 7 mi a ni.

Hetihlai hian Sairang branch YMA chuan thuchhuah siamin, Tlawnglui balu kaiah tui thuk tak (hlam 2 vela thuk) a insiam a vangin fimkhur tura ngenna tunhnai khan an ti chhuak.

"Tlawng luia i lo kalin signboard tarte ngai pawimawh turin kan inngen a, chutihrual chuan khawtual mite a him chin leh him lo chin zawt hram hram thin turin kan inngen a ni," tiin an thuchhuahah chuan an tarlang.