Aizawl; MULCO leh UCO Bank tangkawp chuan kumin chhung hian bawng vulhtu mi 202 hnenah bawng leina tur loan Rs. nuai 5 theuh pek a tum a, hei hian bawnghnute tharchhuah litres 5000 chuanga a tihpun beisei a ni. Thudawnna tarlan danin UCO Bank in loan a pek tur mi 202 zinga 150 te chuan an loan puk tur 1st installment hi an la tawh a, hemi sum hmang hian Meghalaya, Assam leh Bihar atang te in bawng hnute tam chi lak tum a ni a, hei hi a taka tih hlawhtlin anih hunah chuan tuna Mizorama awm sa bakah bawngpui 1000 chuangin a pun beisei a ni a. Bawng vulhtute bawnghnute hi MULCO chuan leisakin loan an rulh na kawng hi a dappui dawn a ni. Kum khat chhunga Bawnghnute a Mizoram indaihlohna hi sum a chantir chuan Rs. vaibel chhe 3673 a tling. Tun dinhmunah MULCO hnuaiah bawng vulha eizawng chhungkua 450 bakah bawnghnute zuar chhungkua 204 leh dairy plant a thawk mi 62 an awm mek. Kum 2011-2012 khan Mizorama bawnghnute tharchhuah zawng zawng chu 13950 tons a ni a, hetih lai hian kum khat chhunga Mizoram in bawnghnute a mamawh chu 95573 tons a ni thung a, kan tharchhuah leh mamawh inthlauhna hi 81623 tons a ni.