Aizawl: Prime Minister-in chhungkaw tinte eng pek vekna tur scheme a siam ‘Pradhan Mantri Sahaj Bijli Har Ghar Yojana (Saubhagya)’ hnuaiah kumin chhungin Mizorama chhungkaw awm zawng zawng eng pek hman vek tum a ni. Power & Electricity Secretary H.Lalengmawia, IAS hnen atanga Zalen thudawn danin Saubhagya scheme-ah hian March 31, 2019 hmain India rama chhungkaw awm zawng zawngte chu eng pek hman vek tura tih a ni a, a senso hi 85% chu central tum tur a ni a, 10% chu state tum ve tur a niin 5% hi loan tur a ni a. Mahse, December 31, 2018 hmaa target tlin an awm chuan 5% hi grant angin a kal dawn niin a sawi. P&E Secretary chuan, “Power department-in nikuma survey an neihah chuan chhungkaw 13854 eng pek tur a awm a, chhungkaw 4000 chuang kan pe tawh a,  kan target hi kumin chhung hian tlin theih kan beisei a ni,” a ti. Power Secretary chuan connection an pek tur chu a thlawn tur nia sawiin hei hian socket point 1 leh light 2 a keng tel a, a bak chu connection la tu ten an tum ve a ngai dawn niin a sawi. “Fur lai a nih avangin hmalak chak a har a; mahse, a hmanrua kan neih tawh avangin fur a zawh veleh chak taka hmalak kan tum a ni,” H.Lalengmawia chuan a ti bawk. Zawhna chhan gin “Kum 2011 chhiarpui ang chuan Mizorama khua census town 30 chu eng la peklohna a ni a, hma kan lak hnuah khaw 11-ah a tla thla a, heng khuaahte hian June 2018 chhungin eng pek hna zawhfel tum a ni,” a  ti. Tuirial Hydel Project chungchangah  “Power pekchhuah hi a tirah unit khat Rs.1.78-in kan lei a, April 27,2018 atangin rate la siam mumal hma chu unit khat Rs. 5.18-in kan lei leh a. Tuirial HEP hi 60 mega watt pechhuak thei a niin 12% hi a thlawnin Mizoram chuan a chang a, a bak pawh a duh chuan a lei vek thei a ni,” tiin a sawi bawk.