Aizawl; Mizoram Forensic Science Laboratory chuan kumin chhungin case 655 an exam tawh a, heta tang hian finfiah ngai chi hrang hrang 13,942 enfiah a ni tawh a. Pawikhawihna hmun enfiahin tum 82 an thawkchhuak tawh a, Court-ah tum 249 an dinpui tawh bakah kutzia Fingerprint database (in AFIS) 4468 an chhinchhiah tawh bawk. Thudawn danin FSL hian thlatin case 100 chuang an dawng ziah a, mahse thawktu (Forensic Expert) erawh chu 14 chauh awmin an indaih lo hle a, tun dinhmunah Division 6 - Chemistry, Toxicology, Balistic, Finger Print, Question Documents, Photography Division awmin Division dang pakhat, Serology Division (DNA lam enfiahna) hawn leh tum mek a ni a, inbuatsaihna chak taka kalpui mek a nih bakah website changtlung tak buatsaihin hei pawh hi hawn thuai theih tura peihfel a ni tawh bawk. FSL thawktute hi an rim hle a, zanlai pawh nise, bomb puak emaw, rukruk emaw leh thil finfiah tur sample la in an chhuak thin a. Hetih rual hian, Court case-ah an report dinpui tura kohna an dawng reng bawk. Forensic thiamna hmanga an report avang hian misual leh pawikhawihnaa inhnamhnawih chhuichhuah kawngah an thawhhlawk hle. Hei bakah hian a khat tawkin training an pe reng bawk a ni.