Aizawl: Internet hmanga mipui ten tui bill an pek theih dan tur PHE leh ICT ten an buaipui mek a, kumin chhungin tih hlawhtlin tum a ni. Zalen palaiin ICT Secretary C.Lalhmachhuana hnen atanga thu a dawn danin ICT Department lam chuan software an peih tawh a, PHE in customer te data lakhawmin computer ah dahluh mek a ni a, hei hi peihfel anih hun chuan Internet hmangin bill a pek theih dawn tih a sawi. ICT Secretary chuan, “Internet hmanga tui bill pek theihna hi mipui remchanna atan liau liaua ruahman a ni a, a duh tan chuan a pangngai angin counter ah a la pek theih tho dawn a ni,” a ti. ICT Secretary chuan tui bill zat leh tui haw hun tur pawh sms hmanga consumer te hriattir tum anih thu a sawi a. Power & Electricity department pawhin PHE ang hian ruahmanna siam ve thei se a duh thu a sawi bawk.