ZALEN July 19, 2026: Kumin January atanga June thla inkar chhungin Aizawl City Traffic Police huam chhungah lirthei chetsualna tum 59 thleng tawhin a kaihhnawihah thi 56 chhinchhiah an ni.

Aizawl City Traffic Police chhinchhiah danin lirthei chetsualna hi AMC huam chhungah niin January thlaah tum 16 thlengin hemi kaihhnawihah hian thi 15 an awm a, January hi kumina chetsual thlen tam ber thla leh thi pawh an tam ber thla a ni.

February thlaah chetsualna tum kua thlengin thi pariat, March thlaah chetsualna tum riat thlengin thi pariat, April ah chetsualna tum 12 thlengin thi 12, May thlaah chetsualna tum riat thlengin thi pasarih leh thla liam ta, June thlaah chetsualna tum ruk thlengin thi paruk an awm bawk.

Aizawl City Traffic Police chhinchhiahna atanga lan danin thla ruk kalta chhung khan an huam chhungah lirthei chetsualna hi tum 59 thlengin heng zinga tum 52-ah hian thihna a thleng a, hliam na tak thlenna tum nga, hliam tenau thlenna tum khat leh hliam awm miah lohna tum khat a awm bawk a ni.

Kumina Aizawl khawpui chhehvela lirthei chetsualna thlengah hian hliam na tuar mi 16, hliam tenau tuar mi 18, an vaiin thite nen mi 90-in lirthei chetsualna hi an tawk a ni.

Aizawl khawpui leh lirthei chetsualna

* Nikum chhung khan Aizawl City Traffic huam chhungah lirthei chetsualna tum 38 thlengin hemi kaihhnawihah hian thi 19 an awm a, hliam tuar 21 an awm bawk.

* Nikum chhung vek khan Aizawl City Traffic huam chhungah hian lirthei dan bawhchhia man zat chu 9799 a ni a, heng zingah hian two wheeler tam berin 7,116 man an ni a. Lirthei dan bawhchhia zawng zawng atanga chhutin two wheeler man zat hi 72.61% a tling.

* Mizoram Police chuan nikum chhung khan hliam leh thihna thleng lirthei chetsualna tum 85 chhinchhiahin heng

zingah hian tlan chak vanga lirthei chetsualna thleng a tam ber.

* Mizoram Police chhinchhiah danin nikum chhung khan lirthei chetsualna hi tum 85 thlengin thi 95 an awm.

* Khawvel puma lirthei awm zinga 1% hi India-a awm nia ngaih a niin hetih lai hian khawvela lirthei chetsualna thleng zinga 11% vel hi India-a thleng nia chhut a ni bawk.