Aizawl; Kumin January thla atanga May thla tawp thleng khan Mizoram ah mahni intihlum 42 an awm tawh a, heng zinga 25 chu mipa an ni a, hmeichhia 17 an awm bawk. New Life Charity Society (NELICS) chhinchhiah danin intihlum zinga a tam ber 36% hi rilru hahna (mental depression) vang a ni a, 21% chu chhungkaw buaina vang, 15% chu inngaih zawn vang, 13% chu ruihtheih thil vang, 10% chu pawisa chungchang vang, 3% chu hlawhchhamna avang leh 2% chu intih hlum chhan chiang taka hriatloh te an ni. Heng intihlum 42 zinga 34 te hi inawkhlum an ni a, a dang hi hmanraw dang hmanga intihlum an ni. Mahni intihlum zingah hian kum 15 tanga 40 inkar tam berin 29 an awm a, kum 41 atanga 70 inkar 11 awmin kum 14 hnuailam 2 an awm bawk. NELICS General Secretary Dr. Zawmsanga sailo chuan a kum tela mental depression an tam chhan chu nu leh paten an fate an duat lutuk vang leh hnathawh an zirtir tawkloh vang nia a hriat thu a sawi a, heng mite hian harsatna an tawhin an buai hma niin a sawi. Kumin 2014 chhung ringawt pawhin mahni intihhlum tum mi 178 in an pan tawh tih a sawi bawk a, heng mite hi councelling pek an nih hnuah intihlum an awm lo niin ZALEN zawhna a chhang bawk. Dr. Robert Khawlhring Psychiatrist chuan mahni intihlum chu a kum telin pung mahse mihring pun nasat vang leh inbiakpawhna that vang in an tam zual nia a lan thu a sawi a. Anmahni pantute zingah a kum a zirin an harsatna tawh pawh a danglam thluah niin a sawi bawk.