ZALEN October 4, 2023 : Champhai South bial-a Congress Candidate tur MPCC Spokesperson Dr. Lallianchhunga chuan Champhai South Vengthar-a campaign a neih naah kumin inthlanah hian Thlarau Indona an hmachhawn dawn niin a sawi, Thlarau indonaah hian Kristian te chak ngei a ngai a ti.

Champhai South bial chhung Vengthar Congress Unit huaihawta Street Campaign neih MPCC Spokesperson, All India Congress Committee (AICC) Member ni bawk chuan, “Mizo te hian a hnam angin kum 1966 atanga 1986 thleng khan Tisa Indona kan hmachhawn tawh a. Kha Tisa Indona ah hian Zoram mipui kan rum a, kan tuar nasa hle a ni. Kohhran mipuite ṭawngṭai chhanna atan Pathianin Remna leh Muanna thlentu atan Congress party a hmang a, Tisa Indona chu tihtawp a ni ta a. Kumin MLA inthlanpuiah hian Mizo Kristian ten Thlarau Indona kan hmachhawn ve thung dawn a ni. He Thlarau Indona ah hian Kristian te kan chak ngei ngei a ngai tawh a. Kan chak loh chuan kan Ram, kan Hnam leh kan Sakhua hi dinhmun hlauhawm takah a ding ngei dawn a ni," a ti.

Dr. Lallianchhuanga chuan puitling zawk ten Thlarau Indona hi tu leh ka fate tan beih a ngai nia sawiin, "SEDP, SEDP ti hman kan ni tawh lova, inthlan an puan hun hunah SEDP sem a tawp dawn tho tho avangin, SEDP dawng tawh zawng zawng te pawh, taima taka hnathawk chhunzawm zawng zawng te chu ṬANG PUIHNA hmangin kan rawn tanpui chhunzawm zel dawn tho che u a. Chuvangin, kan ram, kan hnam leh kan Sakhua a him nan Congress party candidate tana in vote hlu tak pe vek turin ka sawm che u a ni,” a ti.