Harry Styles tan kum 2022 hi kum tha tih loh phal rual a ni lo - a hla hit 'As It Was' chu kumin chhunga hla stream hlawh ber a ni. English singer hian streaming platform lian Spotify-ah UK leh Global chart-ahte ber nihna a hauh a, Ed Sheeran, Drake leh Taylor Swift te chungah a leng a ni. 

Kum 28 mi Harry Styles hian UK-ah hneh takin ro a rel a, chart hrang hrangah No. 1 a kai phak vek. Spotify bikah chuan UK bakah hian khawvel huap pawhin No.1 a hauh phak a, Deezer-ah pawh global chart-ah dinhmun sang ber a luah. Hetih lai hian  Apple Music-ah chuan UK-ah No.1 a hauh laiin, global chart-ah erawh tluk loh pakhat a nei - Apple Music most stream song of 2022-ah hian The Kid Laroi 'Stay' feat Justin Bieber chu pakhatna a ni. 
  
Harry Styles hla hit 'As It Was' hian kumin chhung ringawtin Spotify-ah hian vawi tluklehdingawn 1.5 zet stream a hlawh hem mai - heta tanga amah leh a hla phuahtu ten sum (royalty) an lakluh ringawt hi £mtd 1.5 zet a tling a ni. 

Harry Styles hian Billboard chart-ah kar eng emaw zat ro a rel a, khawvel ram hrang hrangah a hla hian ngaihhlut a hlawh hle a ni. Kumin chhunga music industry-a hla lar ber chu Harry Styles 'As It Was' ngei hi a ni.