Aizawl: SIPMIU-in Tuirial bula Aizawl khawpui bawlhhlawh sawngbawlna hmun an siam ‘Solid Waste Resource Management of Aizawl’ chu kumin chhungin peih hman tum a ni. Tuirial bula bawlhhlawh sawngbawlna hmun hi nimin khan Aizawl chanchinbumite chuan an tlawh a, SIPMIU thawktute chuan tuna Aizawl khawpui bawlhhlawh pai mekna chu chhunzan zawm a khuk luai luia reng avangin mihring hriselna atan pawh a pawi thei a; chuvangin, tuna bawlhhlawh sawngbawlna hmun thar an siam mek chu kum 2019 a zawh tur ni mahse kumin chhunga zo turin hna an thawk mek niin an sawi. SIPMIU thawktute sawi danin tun dinhmunah ni tin bawlhhlawh quintal 1598 vel chu Tuirialah hian paih thin a ni a, tuna bawlhhlawh sawngbawlna hmun thar New Sanitary Landfill ah hi chuan bawlhhlawh tawih thei leh tawih thei lote thliar hran a ni ang a, a tawih theite chu leitha atan hralh leh tum a ni a, hman nawn theih te chu hmang nawnin hman nawn theih loh (glaze tile, darthlalang etc.) te chu tha taka tuam hnuah phum thin a ni dawn a, landfill hi kum 25 thleng dawl zo tura ngaih a ni. Bawlhhlawh sawngbawlna ah hian chi hnih changpat hmanga leitha siamna tur vermi compost plat nitin ton 11 sawngbawl thei tur leh bawlhhlawh tawih thei atang vek hian nitin bawlhhlawh ton 50 atanga leitha siamna tur khawl pawh bun tum a ni. SIPMIU chuan bawlhhlawh tawih thei leh tawih thei lo thliar hranna tur bawk pahnih 10 litres dawng ve ve chu chhungkaw 71,600 te hnenah an sem tawh a, bawlhhlawh phurtu tur lirthei LPK 407 50 leh 207 pick up 4 an lei dawn bawk. Bawlhhlawh sawngbawlna hmun an tlawh zawh hian Bethlehem Vengthlanga Aizawl khawpui thli sawngbawlna hmun tur ‘Sewerage Treatment Plant’ an tlawh leh bawk a, hetah hian Aizawl chhuah lam veng 19 atanga ekthli luangkhawm chu thianghlim taka sawngbawl a ni dawn a, ruahman dan chuan he plant hi December 2017 ah chuan zawh hman tum a ni.