Aizawl; Kumin chhungin cyber crime police station (CCPS)-ah thubuai 72 ziah luh ni tawhin, internet kaltlanga suma inbumna thubuai a tam hle a. CID (Crime) hotute chuan khawpui chauh ni lo, thingtlangah pawh cyber crime thubuai a tam tih ZALEN an hrilh.

Mizoram police hnuaia CID (Crime) atanga ZALEN thudawn danin kumin January atanga July thla kal mek chhungin cyber crime thubuai 72 ziah luh a ni tawh a, chung zinga 18-te internet kaltlanga suma inbumna niin, mipat hmeichhiatna kaihhnawih thubuai pasarih a awm bawk a. Intihhmingchhiatna thubuaite leh cyber crime kaihhnawih thubuai thenkhatte a awm bawk.

CID (Crime) hotute chuan tun hnai chhoah internet kaltlanga suma inbumna a hluar thar hle tih an sawi a, thubuai an dawnte chu Aizawl khawpui chhunga thil thleng a tam ber rualin, thingtlang atang pawhin FIR an dawn tam thu an sawi.

Thubuai pakhata a tuartu (victim) pakhat aia tam awmna a awm thu leh chumi vang chuan a tuartu an tam tih an sawi bawk.  

Internet kaltlanga suma inbumna chungchangah hian tun hnai khan Mizoram police chuan thuchhuah siam tawhin, tunlaiin WhatsApp-ah mi thlalak leh nihna hmanga inbumna (impersonation) a hluar tih an tar lang a, UPI hmang phone app (Gpay, Paytm, Freecharge etc) hmangin hmelhriat loh pawisa thawn a him loh thu te, UPI app hmangte tan, an phone chu an fate/tute, ect. online games khelh nan hmantir a him loh thute, bank-in ATM card number, CVV (ATM card hnung lama number) leh OTP an dil ngai loh thu te an lo tar lang tawh thin bawk.

CID (Crime) chhinchhiah danin, nikum chhung khan Mizoramah cyber crime thubuai 470 vel ziah luh niin, chung zinga zaa 70 vel chu pawisa lam kaihhnawih a ni. 

Cyber Crime thubuai 2022
January    Nil
February   4
March      46
April        7
May         5
June        2
July         8
TOTAL    72