ZALEN November 18, 2023 : Kumin January 1 atanga November 12 inkar chhung khan Mizoramah dengue vanga thi mi pakhat awm tawhin natna vei 1,735 hmuhchhuah a ni tawh a. Dengue vei leh vei lo enna khawl paruk lei belh tum mek a ni.

ZALEN-in health department thawktute hnen atanga thu a dawn danin November 12, 2023 thleng khan dengue vei nia rinhlelh thisen 11,317 endik tawh a niin heng zinga 1,735 chuan an vei tih hmuhchhuah a ni a. Dengue vanga thi hi mi pakhat chhinchhiah tawh niin la finfiah chiah loh, dengue vanga thi ni ngeia hriat ni si mi pakhat a awm bawk.

Joint Director, Health Services Dr. Chawngthanchhunga chuan tun dinhmunah Aizawl leh Lungleiah chiah dengue natna vei leh vei loh finfiahna khawl a awm avangin mipuiten harsatna an tawk tih a sawi a. “Elisa khawl chauh hi dengue natna finfiahna atan hman a ni a. Mizoram chhim lam zawngin Lungleiah an test a ngai a, hmar lam zawngin Aizawlah an test a ngai bawk a. District danga he natna vei nia rinhlelhte thisen pawh finfiah tur chuan an rawn thawn zel a ngai a, mipui tan harsatna a thlen tam avangin a test-na khawl paruk lei turin ruahmanna kan siam mek a. Khawl thar hi district hrang hranga bun tur niin bun fel a nih hun chuan kan harsatna hi a ziaawm ngei kan beisei,” tiin Zalen a hrilh.

Dengue natna finfiahna khawl hi Civil Hospital, Aizawl; Civil Hospital, Lunglei; Zoram Medical College, Falkawn; UPHC, ITI bakah private clinic - Ebenezer Hospital, Trinity, Genesis Laboratory, Lifeline leh Ding Dong Laboratory-ah te a awm mek a ni.

DENGUE vanga thi hi nikum khan Mizoramah mi panga an awm a, kum dangah he natna avanga thi an awm hriat a ni lo.

DENGUE natna thehdarhtu hi thosi tam tak zinga chi khat, Aedes thosi (Mizoten thosi râng an tih) a ni a. Aedes thosi zingah pawh Aedes aegypti thosi hi Dengue natna thlentu ber a ni.

AEDES aegypti hian vawi khat dengue hrik a pai tawh chuan a dam chhungin a pai reng a, a seh apiangten Dengue an vei tawh thin a ni.

AEDES thosite hi Malaria thehdarhtu (Anopheles) thosite ang lo takin zanah ni loin chhun khaw ęn laiin mi a seh deuh ber thin.

Dengue natna thlentu thosi hi Mizoramah a tam hle a, chhun khaw ęn laite leh ruahsur zawhah a rawn pung hluai thin