ZALEN November 12, 2023 : Kumin January atanga November 9, 2023 (Ningani) thleng khan Mizoramah damdawi hman sual vanga thi mi 67 an awm tawh.

Excise & Narcotics department chhinchhiah danin damdawi hman sual vanga thi mi 67 zinga 56 hi mipa niin a dang 11 hi hmeichhia an ni a, an vai hian heroin leh a kaihhnawih vanga thi vek an ni.

Excise & Narcotics department chhinchhiah danin kum 2004 kha damdawi hman sual vanga Mizoramah thi an tam ber kum a ni a, hemi kum hian mi 143 an thi a, kum 2000 khan mi 139 thiin 2003-ah 136 an thi a ni.

END chhinchhiah danin damdawi hman sual vanga thi hi Mizoramah 1,803 an awm tawh a, an zinga 1,587 hi mipa niin hmeichhia 216 an awm tawh a ni.

Damdawi hman sual vanga thi zingah hian Proxyvon/Parvonspas vanga thi tam berin 1,161 an awm a, heroin vanga thi 233 awm bawkin a dang 409-te hi a remchang ang ang tihpawlhte an ni.