ZALEN October 8, 2023 : Aizawl District Court-a Special Judge (Prevention of Corruption Act) Dr HTC Lalrinchhana chuan kumin chhungin ei ruk thubuai nei thiam loh chantir mi 11 a nei tawh a, chung mite chu lung in tang tur leh pawisa chawi tura hrem an ni.

Mission Director, NRHM leh Director, Health Services Department hlui, Dr. N. Pallai chu kum khat lung in tang tur leh cheng nuai 24 chawi tura hrem a ni a, a pawisa chawi tur hi a pe thei lo a nih chuan kum 12 chhung lung in tanin a tlak ang.

C. Lalfakawma s/o C. Thangkhuma (L), Chawnga Road, Khatla South, JE, PWD, Khawzawl Division-a thawk thin chu kum li lung in tan leh Rs. nuai 2 chawi tura hrem a ni a, a pawisa chawi tur hi a pe thei lo a nih chuan kum khat thleng a tan belh ang.

Chakma Autonomous District Council-a Chief Executive Member (CEM) hlui leh chairman ni lai, Kali Kumar Tongchangya, s/o Kegera (L), Kamalanagar- III, Lawngtlai district chu kum li tang tur leh Rs. nuai 4 chawi tura hrem a ni a, a pe thei lo a nih chuan kum hnih dang jail a tan belh ang.

Mustaqur Rahman s/o Abdur Rahman, Guwahati, Assam, MAMCO Consultant ni thin pawh kum nga lung in tan leh Rs. nuai 20 chawi tura hrem a ni a, pawisa chawi tur hi a nei lo a nih chuan kum 20 lung in tanin a tlak ang.

Telecom Department-a officer hlui, Subhrendu Deb Roy chu kum khat lung in tan leh Rs. nuai 3 chawi tura hrem a ni bawk a, pawisa chawi tur hi a pe thei lo a nih chuan kum thum a tan belh ang.

Tuirial Hydel Project siamna tura NEEPCO hmalakna a ram lakna leh zangnadawmna pek chungchangah mi paruk - C. Vanlalchhuana s/o Darphunga (L), Electric Veng, Aizawl; Saiaithanga s/o Chhantuahlala, Tuithiang, Aizawl; C. Rokhumi d/o Chawnghuliana (L), Durtlang, Aizawl; Lalduhawma s/o Lalhungliana, Durtlang Leitan; K. Lalrawna S/o Thangluaia (L), Champhai Bethel leh P.C. Lalthazovi D/o Rodailova, Durtlang Leitan te pawh thiam loh chantir an ni bawk.