Aizawl; Kumin chhungin Lunglei district-ah thubuai 47 ziah luh a ni tawh a, heng zingah hian case 21 chu court-ah chargesheet thehluh a ni tawh bawk.

Lunglei District Police Crime review meeting, Zirtawpnia neihah he thu hi tar lan niin kumina case an neih zingah thih dan pangngai ni lova thi (unnatural death) case pali ziahluh a ni a. Damdawi (drugs) heroin No. 4 kaihhnawihah case pahnih ziah luh tawh niin mi pasarih man tawh an ni a, heroin 3.620kgs an man tawh bawk.

Kumin January 1 atanga March 16 thlenga traffic rules bawhchhiate sum chawitir zat chu Rs nuai 3,08,109 a ni.

Kum kalta, 2022 chhung khan Lunglei district chhungah thubuai chi hrang hrang 205 ziah luh a ni a, heng zinga case 150-te chu court-ah chargesheet thehluh tawh a ni.

Court thubuai chin fel tawh zat chu 120 niin hetah hian case 111-ah convict niin, conviction rate chu 95% a ni.

Kum 2022 chhung khan case thehluh atanga thil bo hmuh let zawng zawng hlut zawng chu Rs. 90,17,760 a ni a, traffic rules bawchhiate hnen atangin Rs. 5,01,450 chawitir an ni bawk.

Crime review meeting hmanpuitu, Lunglei SP Rahul Alwal chuan kum 2022 chhung khan Lunglei district case conviction rate a tha thawkhat hle a, hei hi Lunglei Police leh court-a hnathawkte bakah district chhunga NGO hrang hrang leh mipuite tawiawmna leh inpekna rah a ni tiin mipuite tawiawmnaah lawmthu a sawi.