Kum 2023 la hmang zo chiah lo mah ila, ni tam a awm tawh lo. Kumin chhungin milar inngaizawng leh nupa ni tawh inthen sawi tur an tam hle a, sawi vek sen pawh an ni lo hial zawk. Inthen langsar zual tak tak kan tarlang dawn a ni. 

* Kylie Jenner & Travis Scott : An chanchin hi media te sawi tam ber pakhat a ni a, buaina an ngah vang pawh a ni mahna. Fa pakhat an neih hnuah an inthen a, an inzui leh hnuah an fa pahnihna hmel an hmu leh bawk. Mahse an fate hian hlimna an pe lo nge, an inkar a tha thei tak tak chuang lo - an inthen leh nge nge! Kum tir lam khan an inthen a, an inthen hlen dawn tak tak te pawh niin a lang chho ve mek. 

* Tom Brady & Irina Shayk : An kawppuite ve ve then an ni a, an lunglen lai takin an intawng tih pawhin a sawi theih awm e. Mahse American football quarterback lar Brady leh Russian model lar Irina Shayk te hi fan te phur vang lai takin an inthen leh ta mai a ni. Thla thum vel chauh an inzui hman a, October thla khan an inkar chu a tawp fel ve leh ta der a ni. 

* Maren Morris & Ryan Hurd : Kum 2018 khan an innei a, an hlim viau emaw tih laiin an inthen fel der. American singer Maren Morris hian October thla khan a pasal American country music singer Ryan Hurd lakah hian inthenna lehkha a thehlut a, an inkar a tawp zui ta a ni. 

* Joe Jonas & Sophie Turner : An lar a, an chanchin pawh hriat tur a tam. Kum 4 an innei hman a, Jonas zawk hian September 5 khan inthen dilna lehkha a thehlut a ni. An fate chungchangah buaina an nei zui neuh neuh a, an chanchin kan hre zui zel a nih pawhin a mak lo ang. 

* Pete Davidson & Chase Sui Wonders : American comedian Pete Davidson hi nula lamah a zei riau a nih hmel a, milar tak tak pawh a lo kawp nual tawh. Chung zingah chuan Ariana Grande a langsar ber a, an inzui rei phian bawk. Mahse a chem kalna lamah hian duhthu sam a la tawng lo nge, a rinawm hlei thei lo zawk tih pawh hriatthiam harsa tak a ni. American actress Chase Sui Wonders nen an inzui ve ren rawn a, mahse tunah chuan an inkar hi a tawp ve leh tawh a ni. 

* Britney Spears & Sam Asghari : Britney Spears hian chhungkua leh ruihhlo lamah harsatna tam tak a tawk a, hetih lai hian Sam Asghari hian a thlawp tlat thin. Harsatna a paltlang chho a, kawng dik a zawh mek nia a lan laiin Sam Asghari nena an inkar hi an chhu chat ve leh ta a ni. Kum khat an innei hman a, August thla khan an inkar a tawp thu an puang. 

* Bebe Rexha & Keyan Safyari : American singer Bebe Rexha hian July 28 khan London-ah concert a nei a, hemi tum hian Keyan Safyari nen an inthen thu hi a sawi chhuak a ni. 

* Bella Hadid & Marc Kalman : Kum hnih chhung an in 'date' a, an boruak a tha chho zel dawn emaw tih laiin July thla khan an inthen ve leh a ni. 

* Ariana Grande & Dalton Gomez : Kum 2021 khan an innei a, lawmpuitu pawh an ngah hle. Mahse kum 30 mi Ariana Grande hian July thlaa Wimbledon a en tum khan an inneih zungbun a bun lo tih hriat a ni a, an lo inthen fel der tawh - kum hnih chauh an innei hman. 

* Avril Lavigne & Tyga : An lar a, sum pawh an ngah - mahse hmangaihna hi suma lei theih a ni si lo. Kum tir lamah an inzui thawm a ri tan a, mahse thla 4 vel chauh an inzui hman tihin June thla khan an inthen ve leh a ni. An inthen rual hian an inhualna pawh an titawp nghal. 

* Camila Cabello & Shawn Mendes : Mi tam tak chuan Camila Cabello hian a phu lo an ti thin, mahse Canadian singer Shawn Mendes hian mite hmuh loh thil tha a hmu a ni mai thei an inzui rei phian. Kum 2019 atangin an inzui tan a, 2021 khan an inthen. Kuminah sawi zawm leh an ni a, mahse kum pawh tluan zo loin an inthen ve leh ta a ni. 

* Billie Eilish & Jesse Rutherford : 'Bad Guy' singer Billie Eilish leh Neighbourhood frontman Jesse Rutherford te hi kum khat pawh an inzui hman lo a, milar dangte ang bawka dam chhung atan 'tiam tlat e' ti chunga inthen leh vat ai chuan tiin inhual buai loin an inthen zui leh ta a ni.