Aizawl: Khawchhak ramte nena sumdawnna tur kawng Kaladan Multi Modal Transit Transport Project (KMMTTP) chu kumin chhung ngei hian zawh hman tum a ni. Zalen palaiin KMMTTP enkawltute hnen atanga thu a dawn danin Lawngtlai atanga Mizoram tawp Zorinpui thleng laih tur kawngpui hi kms 87.14 a thui tur a niin tunah hian 80.85 kms laih tawh a ni. He kawngpui ah hian lei 8 dawh turah 2 dawh zawh a ni tawh a, culvert leh retaining wall pawh a chanve thawh zawh a ni tawh bawk a, 66.645 kms a thui lung phah a ni tawh a, 9kms a thui metal a ni tawh bawk. Kaladan Multi Modal Transit Transport Project ( KMMTTP) hi a tirah 117kms a thui turin RITES Company chuan kawng an zawng a, a hnuah PWD in 99.83kms turin an zawng tha leh a, a taka hna thawh a nih hnuah kawng kual lai thenkhat paih hlek hlek a niin 87.14 kms turin revised leh a ni a. Tunah hian Atlanta ARSS leh RDS Project Ltd. Delhi chuan hna an thawk mek a, a project hi Rs. vaibelchhe 677.185 man tur a ni.