Aizawl; Kumin 2014, January - July, thla 7 chhung khan Mizoram Police te chuan pawngsual thubuai 62 ziahluh an nei tawh a, hemi hun chhung vek hian tualthah thubuai 31 ziahluh an nei bawk. Police record a tarlan a nih danin, kumin january thla khan tualthah thubuai 3 leh pawngsual thubuai 2 Mizoram Police te chuan ziahluh an nei a, february thla ah tualthah thubuai 4 leh pawngsual thubuai 3, March thla ah tualthah thubuai 7 leh pawngsual thubuai 5, April thla ah tualthah thubuai 2 leh pawngsual thubuai 9, may ah tualthah thubuai 5 leh pawngsual thubuai 13, june ah tualthah thubuai 7 leh pawngsual thubuai 17, july ah tualthah thubuai 3 leh pawngsual thubuai 13 ziahluh an nei a ni. Hetihlai hian hmarchhak state paruk ah hmeichhe chunga hleilenna a hluar hle a, hmeichhe chunga pawikhawihna thleng chhinchhiahah Assam chu a thlen tam berna a ni. Assam hi hmeichhe chunga hleilenna thlen tam lamah India ram pumah pasarihna a ni a, nikum pawh khan he dinhmun hi a lo hauh tawh bawk a ni. National Crime Records Bureau-in Crime in India, 2013, report a tihchhuahah Andhra Pradesh chu India ramah hmeichhe chunga pawikhawihna tam berna niin, Uttar Pradesh-in a dawt a, West Bengal, Rajasthan, Maharashtra leh Madhya Pradesh te'n an dawt leh a ni. Kum 2012 khan West Bengal-ah pawikhawihna hi a hluar ber a, nikum khan a pathumnaah a tla a, Assam chu kum 2012-a hmeichhe chunga pawikhawihna case ziahluh zat, 13,544 atangin nikum khan 17,449-ah a chho thung. Tripura-ah pawh pawikhawihna hi a pung chho hret a, kum hmasaa 1,628 atangin nikum khan 1,559 a pung chho bawk a, Meghalaya-ah pawh 255 atangin 343-ah a chho bawk a ni. Arunachal Pradesh-ah 201 atangin 288-ah a chho a, Sikkim pawh 68 atangin a 93-ah a chhoh bakah Nagaland pawh 51 atangin 67-ah a chho bawk. Hetihlai hian Mizoram leh Manipur-ah chuan hmeichhe chunga pawikhawihna thubuai ziahluh zat hi a tlahniam thung a, kum 2012-ah Manipur-ah chuan case 403 ziahluh a nih laiin nikum khan 285-ah a tlahniam hret a, Mizoramah pawh 199 atangin 177-ah a tlahniam bawk a ni. Assam-ah hian kum 2013 khan pawngsual thubuai 1,937 ziahluh a ni a, kum 2012 khan case 1,716 ziahluh a lo ni tawh bawk. Hmarchhak state zingah Assam hi Tripura-in dawtin, kum 2012-a 229 atangin 233-ah nikum khan a pung a ni. Meghalaya-ah pawngsual thubuai hi kum hmasa a 164 atangin 183-ah pung bawk a, Arunachal Pradesh-ah 46 atangin 75-ah, Manipur 63 atangin 72-ah, Sikkim 34 atangin 43-ah, Nagaland 21 atang­in 31-ah a pung bawk a ni. Mizoram chu kum 2012 leh 2013-ah pawngsual thubuai tlakhniamna state awmchhun a ni a, thubuai 103 atangin 89-ah a tlahniam a ni.