ZALEN September 28, 2025: Kumin kum tir atanga September 16, 2025 thleng khan Mizoramah ruihhlo vangin mi 65 an thi tawh.

Excise & Narcotics Department chhinchhiah danin ruihhlo vanga thite hi mipa 54 leh hmeichhia 11 an ni a. Ruihhlo vanga thi zinga 24 hi heroin ti thin niin a dang 41 hi heroin leh thil dang ti kawpte an niin ruihhlo hmansual vanga thite hi kum 19 atanga 57 inkar an ni.

Chhinchhiahna atanga a lan danin kum 1984 atanga khan Mizoramah ruihhlo vangin mi 1944 an thi tawh a, heng zinga 1,707 hi mipa niin hmeichhia 237 an awm bawk.

Excise & Narcotics Department hian kumin kum tir atanga September 15, 2025 thleng khan sawrkarah chhiah Rs. 1,77,63,938 an chhunglut tawh bawk a. Hengte hi foreign liqour & spirit atangin Rs. 128,30,078, fines & confiscation atangin Rs. 48,67,400 leh thil dang atangin Rs. 66,460 te an ni.

Hemi hun chhung vek hian END chuan heroin kg. 29.210, ganja kg 170.182, methamphetamin kg 182.936 bakah ruihhlo engemaw zat an man a. Ruihhlo phurhna atana hman lirthei two wheeler 61, LMV 72, MMV pakhat leh HMV pathum an man bawk.

Excise & Narcotics Department chuan kumin chhung hian ND&PS Act hnuaiah thubuai 409 ziak lutin mihring 724 an man tawh a. MLP Act hnuaiah thubuai 4,502 ziak lutin mihring 4,067 an man a, ME Act hnuaiah thubuai 242 ziak lutin mihring 216 an man bakah Drugs & Liquor law hnuaiah mi 40 an man tawh bawk.