ZALEN January 22, 2025 : Mizote thei chin zingami, serthlum chu kuminah hian kum hmasa lam ngaihtuahin a thar tlem a, hetia a thar tlem chhan hi a tâm (rah tha lo) a tam vang niin an sawi a. Kum dang ai chuan Aizawl khawpuiah pawh hmuh tur a tlemin a man pawh a to zawk bawk.

Kum 1990 hma lam kha chuan serthlum hi Mizoram khawtlang lamah an ching nasain an thar tha hle a. Mahse, a rah that loh avang leh a tâm hri nia hriatin a ei chhiat avangin khawchhak lamah an ching chho tan a. Mizoram serthlum tam ber hi khawchhak lam - East Lungdar, Biate, Sialhawk, N.Vanlaiphai leh Leng khaw chhehvela mite an ni deuh ber a. A tlangpuiin lo neitute hian serthlum chi hrang hrang zingah ‘Khasi mandarin’ tih hi an ching deuh ber a ni.

ZALEN zawhna chhangin Biate Village Council President C. Lalrinliana chuan serthlum chu an thar tha lo tih sawiin tun dinhmunah hralh tur pawh an nei tawh lo niin a sawi a. “Kum dangah chuan serthlum atang hian sum tam tak kan khua hian kan lalut thin a, kuminah erawh nuai chuang hralh chhungkaw pakhat an awm tih loh chu hralh tha pawh an awm lo a ni,” a ti a. Serthlum thar that loh chhan chu an hriat mai loh thu sawiin, “A tam hri hian a bawh niin kan hria a, Thing tâm vang em ni aw te kan ti mai mai a. Kumin hian serthlum kung hmuhnawm a awm lo a, a rah awm chhun pawh a pisil hrim hrim a ni,” a ti.

East Lungdar VCP K.Lalngaizuala pawhin serthlum chingtuten kum dang an pha lo vek tih a sawi a. “Kum dangah chuan nuai tel hralh thin chhungkaw eng emaw zat an awm thin a. Kuminah erawh chuan hetianga hralh hi chhungkaw 2/3 bak an awm ka hre lo a. Kum dang ang thovin a kung hi kan enkawl tha chungin a rah a tha tlat lo a ni,” a ti a. Amah pawhin serthlum kung 200 chuang a nei chungin engmah thar a nei lo niin a sawi bawk.

Hetih lai hian horticulture department-a thawk pakhat chuan serthlum leh thlai dangte chu tha taka rah tur chuan ngun leh uluk taka enkawl a ngai tih a sawi a. “Kan thlaite hi chaw tha pek leh tui an mamawh tawk pek kawngah tun ai hian kuthnathawktute hian tan kan lak leh zual a ngai a, thlai thenkhat hi chu kan enkawl danin duhthu a sam tawk loh avangin kan seng hlawk lo fo a. Chu mai bakah kum hmasa lama a thar hlawk hian a kum lehah hian a ip duh khawp mai,” tiin ZALEN a hrilh.

Mizoram serthlum hi a tui a tam bakah a thlum tui a, hei vang hian hralh a kalin state pawna phurh chhuah pawhin miten an duh hle nia thudawn a ni.